LIQUIÇA, 16 marsu 2021 (TATOLI) – Negosiante sira ne’ebé hala’o sira-nia negósiu modo-tahan no ai-fuan iha Merkadu Liquiça, la folin ona hanesan loron sira baibain tanba kompradór sira menus no labele ona lori mai fa’an iha Dili.
Iha loron baibain molok pandemia COVID-19 abitante sira Liquiça no barak iha Dili sempre ba sosa modo-tahan no ai-fuan iha Liquiça, maibé dezde Governu deside aplikasaun serka sanitaria iha kapitál Dili, bandu movimentu iha Dili ba Liquiça, halo kompradór sira hosi Dili la ba ona sosa negosiante sira-nia modo-tahan ho ai-fuan ferska sira iha Merkadu Liquiça. Ho nune’e, modo-tahan no ai-fuan sira la folin to’o balun dodok soe de’it.
Notísia Relevante : Folin foos sa’e, MTKI Liquiça halo intervensaun
Dulce Boavida Soares, nu’udar negosiante modo-tahan iha Merkadu Liquiça, triste ho situasaun ida-ne’e tanba modo-tahan ne’ebé nia fa’an loron ba loron ema la sosa to’o dodok de’it.
“Ami triste loos haree ba ami nia sasán sira-ne’e, agora ami kréditu hela iha uniaun kréditu hanesan Tuba Rai no Moris Rasik no kada semana ami tenke hatama osan, mas modo ho ai-fuan sira ami fa’an ne’e la folin ona,” Dulce Boavida Soares, haktuir ba Agência Tatoli iha Merkadu Liquiça, tersa ne’e.
Iha loron bain-leet, bainhira modo ka ai-fuan sira sosa barak sempre lori mai fa’an iha merkadu kapitál Dili, maibé agora Dulce Boavida Soares, Armandina Bui ho nia negosiante maluk sira la bele ona lori modo ho ai-fuan sira ne’e mai fa’an iha Dili tanba aplikasaun serka sanitaria no konfinamentu.
Modo dodok ne’ebé Dulce ho Armandina no sira-nia negosiante maluk sira soe de’it kuaze karreta angguna isin-lima iha semana ida nia laran tanba modo sira-ne’e sosa barak tiha la konsege lori ba fa’an iha merkadu Dili.
“Ida ne’e susar boot ida kona ona ami. Ami atu ba foti tan osan iha ne’ebé para bele hatama ba Tuba Rai ho Moris Rasik,” Armandina hateten.
Modo-tahan ho ai-fuan sira-ne’e, Dulce ho Armandina, ba sosa tutan fali hosi to’os na’in sira iha Leorema, Bazartete, Sare, Loes no balun tenke ba sosa iha Bobonaro. Maibé la bele ona lori ba fa’an iha Dili.
Dulce ho Armandina mós preokupa uitoan bainhira pandemia COVID-19 ne’e hotu no Governu reativa fali eskola, maka sira la hatene ona atu ba foti osan ho hahán iha ne’ebé maka lori selu sira-nia oan nia eskola iha Liquiça no iha Dili.
Jornalista : Hortencio Sanchez
Editór : Francisco Simões
