DILI, 16 marsu 2021 (TATOLI) – Provedoria Direitu Umanu no Justisa (PDHJ) arrola ona keixa ne’ebé hatama hosi komunidade relasiona ho kazu oknum Polísia Nasional Timor-Leste (PNTL) ne’ebé basa ka baku pesoál Servisu Saneamentu Munisípiu Dili, foin lalais ne’e, iha Tasi-tolu, Dili.
Instituisaun independente ne’ebé halo advokasia no tau matan ba violasaun sira direitu umanu ne’e rejista mós keixa seluk tan hosi komunidade kona-ba insatisfasaun hosi atuasaun pesoál saúde nian ho pesoál seguransa ne’ebé foti abitante ida ba konfinamentu obrigatóriu la ho dignu umana.
Notísia Relevante : PDHJ rekomenda ba Governu responde nesesidade bázika povu nian
Relasiona ho kazu oknum PNTL ida basa pesoál Saneamentu no haruka pesoál Saneamentu na’in-rua basa malu ne’e, PDHJ enkamiña ona karta ba iha Primeiru-Ministru (PM), Taur Matan Ruak, nu’udar mós Ministru Interiór, Komandu Jerál PNTL ho Prokuradoria Jerál Repúblika (PGR).
Ba Agência Tatoli, tersa ne’e, via telefone, Provedora Jesuína Maria Ferreira Gomes, hateten asaun membru PNTL ne’e ilegál tanba halo agresaun fízika (krime) no la halo tuir dekretu Prezidente Repúblika (PR) 15/2021 artigu neen (6) katak durante Estadu Emerjénsia labele afeta ba direitu atu labele hetan tratamentu kruél, dezumanu ka degradante.
PDHJ rekomenda ba PNTL atu halo investigasaun no instaura prosesu dixiplinár ba membru relevante no partilla rezultadu investigasaun ho PDHJ.
“PDHJ mós rekomenda ba Governu atu hadi’a koordenasaun institusionál hodi evita kazu hanesan akontese tan iha futuru,” Jesuína Maria Ferreira Gomes informa.
Ba keixa ida hasoru pesoál saúde no pesoál seguransa kona-ba atuasaun la umana ne’e, PDHJ sei halo hela verifikasaun no levantamentu atu bele hetan ninia verdade ho rigor atu bele foti medida tuir kompeténsia Lei ne’ebé atribui ba PDHJ.
Provedora Jesuína Maria Ferreira Gomes, informa tuir dadus hosi PDHJ nian ba keixa regular hosi janeiru to’o marsu, tinan ne’e rejista keixa hamutuk 49 kompostu hosi indísiu violasaun direitu umanu 29 no governasaun ladi’ak 20.
Hafoin rejista keixa, PDHJ sei halo relatóriu avaliasaun preliminár no lori ba komité jestaun keixa iha PDHJ hodi halo apresiasaun no desizaun ba keixa hotu.
Jornalista : Nelson de Sousa
Editór : Francisco Simões
