DILI, 26 marsu 2021 (TATOLI)—Airnorth voo hosi Austrália Norte, Darwin to’o iha Aeroportu Internasionál Prezidente Nicolau Lobato, Comoro, Dili, sesta ne’e, iha tuku 12:30 no Airnorth seluk ho destinasaun hanesan to’o iha tuku 13:55.
Tuir observansaun Agência TATOLI iha terrenu, aviaun rua ne’e hatún karga no hetan akompañamentu hosi Banco Central de Timor-Leste (BCTL) no seguransa másimu hosi Polísia Batallaun Orden Públiku (BOP), maibé taka hosi kobertura mídia sira.
Hafoin hatún karga, ekipa saúde rega dizinfeta no tula karga ba karreta rua, hafoin ekipa BCTL, BOP no entidade relevante halo akompañamentu to’o tama iha edifísiu Banku Sentrál, Akait, Dili.
Ba kestaun ne’e, Ministru Transporte Komunikasaun, José Agostinho da Silva, informa, aprovasaun voo hosi Autoridade Aviaun Sivíl Timor-Leste (AACTL, sigla portugés) ne’ebé tama iha ninia gabinete, ho destinasaun Darwin–Dili lori karga (la temi detallu).
“Tuir karta pedidu, aviaun mai Dili ne’e tula karga,” Ministru José Agostinho informa ba Agência TATOLI, via telefónika, sesta ne’e.
Kona-ba karga ne’e osan, governante ne’e dehan, nia parte ladún hatene kona-ba sasán saida mak tula mai.
“Iha pedidu karga, tanba durante ne’e tuir esperiénsia ne’ebé maka ita iha, aviaun tama lori sasán emerjénsia liga ba ita-nia nesesidade hanesan ekipamentu médiku no seluk tan,” nia dehan.
Iha sorin seluk, Governadór BCTL, Abraão de Vasconcelos, la fó komentáriu detallu kona-ba karga ne’ebé to’o meiu dia ne’e.
“Asuntu ne’e sensitivu oituan liga ho kestaun seguransa, ami mós lahatene karik ema iha fatin sira ne’ebé trata lisensa mak bocorkan,” Governadór Banku Sentrál dehan.
Tuir Dirijente ne’e, BCTL iha prosedimentu interna atu trata asuntu konfidensiál hanesan agora.
Jornalista: Natalino Costa
Editora: Julia Chatarina
