DILI, 26 marsu 2021 (TATOLI)–Misaun Permanente Repúblika Demorátika Timor-Leste iha Genebra partisipa iha serimónia inaugurasaun programa komérsiu no páz ‘Trade for peace (T4P)’, ne’ebé realiza iha sede World Trade Organization (WTO) iha Genebra, Suiça.
“Atividade inagurasaun hala’o dezde kinta iha tuku 15:00 oras lokál. Ha’u horiseik halo intervensaun hodi naran Ministru Koordenadór Asuntu Ekonómiku (MKAE), Joaquim Amaral nian,” Enkaregadu Negósiu Misaun Permanente Timor-Leste ba Nasaun Unida no Organizasaun Internasionál iha Genebra, Francisco Dionísio Fernandes ‘Mau-Kura’, hateten liuhosi nota imprensa ne’ebé Agência TATOLI asesu, sesta ne’e.
Tuir reprezentante ne’e, programa T4P destina ba nasaun sira ne’ebé iha situasaun frajíl post konflitu.
“Timor-Leste hanesan nasaun pioneru ba g7+, nune’e mós partisipa estabalese grupu g7+ WTO adezaun nian. Tanba ne’e, atu fahe esperiénsia ho nasaun iha grupu kona-ba prosesu adezaun ba membru organizasaun komérsiu mundiál,” nia akresenta.
Vantajen ba Timor-Leste mak atu fasilita prosesu adezaun ba membru WTO, nune’e bele integra ba ekonomia globál.
T4P nu’udar programa ho inisiativa hodi realiza inaugurasaun ba dala-11 hosi Konferénsia WTO nian, ne’ebé hala’o hosi liña ministeriál Buenos Aires iha dezembru 2017 no hetan apoiu hosi g7+ WTO ne’ebé iha ona konkordánsia entre grupu.
“Objetivu T4P atubele kria kondisaun favorável ne’ebé sei tulun nasaun sai hosi situasaun frajil no konflitu, ba nasaun ne’ebé mak iha garantia estabilidade ekonomia no povu bele moris di’ak.
“Ida-ne’e nu’udar faze dahuluk asuntu nasaun frajil, ne’ebé bele hetan atensaun hosi membru WTO no sai mós nu’udar problema sistemátiku ida,” Mau-kura subliña.
Inaugurasaun programa ne’e partisipa hosi eis Ministru Komérsiu no Indústria no Xefe Negosiadór ba WTO hosi akordu Liberia, Ngozi Okonjo weala, Diretór Jerál WTO, Embaixadór Alan Wm. Wolff, WTO Deputy, Maika Oshikawa, Diretór Divizaun Accensions, Enkaregadu Negósiu Misaun Permanente-Timor-Leste ba Nasaun Unida no Organizasaun Internasionál iha Genebra, inklui Reprezentante Timor-Leste, Francisco Dionísio Fernandes ‘Mau-Kura’, ne’ebé hato’o mós nia diskursu em nome Ministra Negósiu Estranjeiru no Kooperasaun (MNEK) no MKAE.
Nune’e mós, Sekretaria I, Ralyana Ribeiro no Asesór Legál ba Misaun Permanente Timor-Leste iha Genebra, Joana Santos.
Oradór seluk hanesan, Sekretáriu Jerál g7+ no sira seluk hanesan, Plus Oman, Libia, Irak, Korea, no Estadu Unidu Amérika (EUA).
Jornalista: Antónia Gusmão
Editora: Julia Chatarina
