DILI, 26 marsu 2021 (TATOLI)—Autoridade Nasionál Aviaun Sivíl Timor-Leste, (AACTL, sigla portugés) aprova ona pedidu voo charter ho aviaun Citilink hosi Ajénsia Viajen, ho destinasaun Kuala Lumpur-Dili, ne’ebé sei to’o iha Aeroportu Internasionál Prezidente Nicolau Lobato, Comoro, iha tuku 11:55, tersa (30/03) no tuir ajenda sei filafali iha tuku 12:55 loron hanesan.
Ministru Transporte Komunikasaun, José Agostinho da Silva, hateten, pedidu voo ne’e tama iha ninia gabinete iha sesta (26/03) ho diskrisaun sei transporta timor-oan sira no viajen ne’e sei kumpre protokolu saúde ne’ebé estabelese ona.
“Pedidu hosi Citilink tama mai Ministériu Transporte Komunikasaun liuhosi AACTL no daudaun iha ona ha’u nian meza, pedidu ne’e atu transporta traballadór timor-oan hamutuk 168 bá rai-li’ur,” Ministru José Agostinho informa ba Agência TATOLI, via telefónika, sesta ne’e.
Tuir governante ne’e, voo ne’e koordena ona ho liña ministeriál hanesan Ministériu Negósiu Estrajeiru Kooperasaun (MNEK), Ministeriu Interiór (MI), Ministériu Saúde, inklui Sala Situasaun Sentru Integradu Jestaun Krize (CIGC, sigla portugés).
“Pasajeiru sira ne’ebé sei bá rai-li’ur hanesan traballadór ne’ebé maka foin atu bá serbisu iha Inglatera no balun hanesan sira ne’ebé pasa féria ho família no atu bá filafali iha Inglatera no Irlanda,” nia akresenta.
Jornalista: Natalino Costa
Editora: Julia Chatarina
