DILI, 05 abríl 2021 (TATOLI)-Dezastre naturál ne’ebé akontese iha territóriu Timor-Leste, hosi loron 30 marsu to’o mai loron 04 abríl, tinan ne’e, rezulta abitante na’in-21 maka lakon vida.
Notísia Relevante : Dizastre naturál halakon ema 13 nia vida, uma-kain 1.579 evakua
Dadus provizóriu hosi Sekretária Estadu Protesaun Sivíl (SEPS) liuhosi Sentru Koordenasaun Operasionál Jestaun Risku Dezastre, kontempla abitante na’in-21 lakon vida ne’e hahú hosi Munisípiu Ainaro, mota lori labarik feto ida (1) ho idade tinan hitu (7) iha Aldeia Airatalau, Suku Aituto, Postu Administrativu Maubessi, iha loron 30 marsu 2021 no to’o agora seidauk hetan mate-isin.
Iha loron 01 abríl 2021, ema na’in-rua (2) mane hotu, lakon vida tanba ai hanehan karreta Carry ida iha área Same nian. Iha loron hanesan rai halai akontese iha Aldeia Tarabula, Suku Maulau, Postu Administrativu Maubisse, Munisípiu Ainaro, ne’ebé rezulta ema na’in-lima (5) lakon vida no hosi ema na’in-rua; inan no bebé hetan ona no aman ho oan feto na’in-rua seidauk hetan.
Iha Munisípiu Dili udan no anin boot ne’ebé akontese iha loron 03 to’o loron 04 abríl, tinan ne’e, hodi hamosu inundasaun no rai halai rezulta ema na’in-13 mak lakon vida.
Hanesan iha area Kampu Merdeka, Comoro nian, iha labarik na’in-rua no ema adultu na’in-rua ho totál na’in (4) iha Aldeia Moris Foun, Suku Comoro, ema adultu na’in-rua no labarik na’in-ida no labarik ne’e seidauk hetan ho totál na’in-lima (5).
Iha fali area Bee-duku, ema adultu na’in-rua (2) no labarik na’in-ida (1) ho totál na’in-tolu (3) no na’in-rua (2) iha Suku Ailok, Hera, inklui membru polísia na’in-ida, vítima hirak ne’e tanba bee lori no rai taka hanehan.
Kona-ba totál dadus provizóriu vítima dezastre hamutuk uma-kain 2,065 hosi munisipiu Viqueque, Covalima, Baucau, Manifahi, Bobonaro, Rejiaun Administrativu Espesiál Oe-Cusse Ambeno (RAEOA).
Ekipa dezastre sira iha munisípiu halo ona prosesu lavantamentu atu apoiu emerjénsia faze dahuluk nian hanesan ai-han no la’ós ai-han hafoin kontinua prosesu apoiu rekuperasaun ba hela fatin ne’ebé hetan estragu.
Família uma-kain 1.579 evakua ba sentru evakuasaun 11
Udan no anin boot ne’ebé akontese iha munisípiu Dili rezulta inundasaun maka’as no bee-tama komunidade sira-nia hela fatin. Nune’e uma-kain 1.579 evakua ona ba iha sentru evakuasaun provizóriu hamutuk 11 iha Munisípiu Dili.
Sentru evakuasaun hanesan sentru Dom Bosco, Comoro, hamutuk uma-kain 500 provizóriu ho totál ema na’in-2.437 no edifísiu SEPS, Caicoli, iha uma-kain 180 ho membru família na’in-815.
Edifísiu Ministériu Solidariedade Sosiál no Inkluzaun (MSSI) iha uma-kain-19, edifísiu Ministériu Finansas Aitarak-Laran iha uma-kain 656, edifísiu Cruz Vermella Timor-Leste (CVTL) ema na’in-69.
Iha eskola Liceo iha uma-kain 39 ho membru família na’in-528, salaun Infordepe, Balide, uma-kain-120, Igreja São Sebastião Bidau iha uma-kain-35 no sentru Madre Saleziana Balide, Radio Lorosa’e Sereja ho São João Paulo II sei alista.
Udan no anin boot iha loron hirak ne’e kuaze iha Dili laran afeta inundasaun hanesan komunidade sira hela besik mota Comoro, Tasi-Tolu, Becuse, Bidau ho fatin sira seluk ne’ebé inundasaun bee hodi tama estraga sasán.
Tuir observasaun Agência Tatoli iha sentru evakuasaun Dom Bosco, Comoro, ho edifísiu SEPS Caicoli, nota iha família barak hanesan ema adultu, labarik, ema ho defisiénsia no sira seluk ne’ebé hetan atendimentu di’ak hosi parte SEPS no parseiru sira.
Ekipa médiku sira mós destaka iha sentru Dom Bosco Comoro hodi fó atendimentu saúde konsulta ba família sira.
Gaspar Soares, nu’udar abitante ne’ebé evakua nia família ba Dom Bosco Comoro dehan, sira-nia uma la aproveita tanba inundasaun.
“Ami hela iha Delta nian, bee tama uma ho naruk to’o iha ita nia kakorok halo ami nia sasán hotu la aproveita, ami evakua ho de’it roupa isin-lolon,” Gaspar Soares hateten.
Marta dos Santos hanesan família afeta mós husu ba Governu atu bele tau atensaun hodi fó apoiu ba sira tanba ho inundasaun ne’ebé akontese fó sofre tebes ba sira hodi estraga hotu sasán uma laran.
Sekretáriu Estadu Protesaun Sivíl (SEPS), Joaquin Gusmão, hateten ekipa SEPS kontinua rekolla dadus iha terrenu no kontinua evakua família afetadu sira ba fatin seguru hanesan fatin evakuasaun ne’ebé prepara ona.
Iha segunda ne’e, SEPS Joaquin Gusmão, akompaña hosi kargu xefia SEPS nian kontinua hala’o enkontru koordenasaun ho parseiru dezenvolvimentu nasionál no internasionál sira hodi bele hala’o atuasaun fó asisténsia ba komunidade afetadu dezastre naturál iha territóriu nasionál.
Jornalista : Nelson de Sousa
Editór : Francisco Simões
