DILI, 06 abril 2021 (TATOLI)—Responsável Sentru Formasaun Don Bosco Comoro, Adriano Maria dos Reis informa, ohin, Sekretáriu Jerál Partidu Frente Revolusionária Timor-Leste Independente (Fretilin), Mari Alkatiri, lori Fretilin nian naran mai vizita no fó apoiu sasán nesesidade bázika ba vítima dezastre naturál ne’ebé evaku no refujia iha sentru ne’e.
“Ohin, Mari Alkatiri mai vizita refujiadu sira iha Sentru Formasaun Don Bosco Comoro ne’e, em nome partidu no fó mós sira-nia kontribuisaun hanesan foos, Supermie, Popmie no bee ba vítima sira iha ne’e,” Adriano dos Reis hateten ba jornalista sira, iha Sentru Formasaun Don Bosco Comoro, tersa ne’e.
Nia hatutan, Mari Alkatiri hala’o vizita ne’e ho tempu lalais de’it tanba hakarak fó de’it apoiu umanitária ba vítima dezastre naturál sira-ne’ebé hela iha sentru refere, hodi la hato’o hela mensajen ruma.
“Ohin, Mari Alkatiri mai vizita vítima sira iha ne’e, ha’u rasik husu atu hato’o buat ruma ba ita-nia vítima sira maibé nia dehan tempu lalais liu atu fila ona,” nia dehan.
Aleinde ne’e, responsável ne’e informa, ohin, hosi parte Sentru Formasaun Don Bosco Comoro halo ona enkontru ho Ministériu Interiór (MI) hodi halo koordenasaun atu hahú aban ba oin, xefe aldeia sira inklui ekipa task force hosi Governu atu ba identifika vítima sira-nia hela fatin.
Tanba, tuir nia, vítima balun ne’ebé hela iha sentru ne’e halo ona teste swab tanba propagasaun COVID-19 ne’e la’o hela, entaun ohin mós ekipa saúde kontinua halo teste no aban sira sei halo teste swab hotu ba vítima dezastre natuirál sira-ne’ebé hela iha sentru refere.
Oinsá halo kontrolu, nia hatán, susar atu halo kontrolu ba vítima sira-ne’ebé barak mak hela iha fatin refere. Maibé, atu halo kontrolu di’ak mak tenke liuhosi teste swab, atu nune’e bele identifika karik iha vítima balun mak afeta ba moras COVID-19 karik tenke halo asaun ho lalais.
Ho kestaun refere, responsável ne’e informa ba vítima dezastre naturál sira-ne’ebé uma sei di’ak no karik sasán lakon ne’e, sira bele fila ona depois mak karik Governu no Organizasaun Naun Governamentál sira fó apoiu mak ajuda lori hela ba sira-nia hela fatin.
“Ida-ne’ebé uma laiha duni ona mak ita tau iha ne’e. Maibé hotu-hotu hela iha ne’e, entaun oinsá mak ita bele rezolve. Tanba ne’e risku boot,” nia dehan.
Tanba, responsável ne’e preokua bainhira entre vítima sira-ne’e mak ida afetadu COVID-19 mak prátikamente sei kona hotu tanba ema barak hela hamutuk iha fatin ida, bainhira sira-nia imunidade fraku.
“Tanba ne’e, ami hanoin, horisehik ami haruka ema defisiénsia inklui ho inan isin-rua ho labarik sira ba madre sira iha Dili laran, nune’e evita moras ne’e,” Bruder ne’e hateten.
Tuir nia, refujiadu ne’ebé daudaun evakua no hela iha fatin ne’e xefe família hamutuk 500-resin no totál ema hamutuk 3.000, no hosi totál hirak ne’e barak mak la hela iha fatin ne’e.
Bruder Adriano infroma, labarik sira-ne’ebé evakua hamutuk ho sira-nia inan-aman, ne’ebé hela iha Sentru Formasaun Don Bosco Comoro ne’e kuaze hamutuk 300-resin.
Guvernu fornese bee-moos litru rihun 70
Tuir nia, tanba bomba iha fatin evakuasaun ne’e avaria iha domingu (04/04/2021)-segunda (05/04/2021) mak nia parte husu apoiu ba Governu hodi fornese bee-moos ba vítima dezastre naturál ne’ebé refujia iha fatin refere, tanba ema barak entaun nesesidade mós barak.
“Governu fornese bee-moos litru 70.000 ba refujiadu iha Sentru Formasaun Dnm Bosco Comoro. Dezde domingu lorokraik to’o horiseik dader bomba avaria, entaun ami susar ba bee. Ami husu Governu mak foin fornese bee-moos hodi enxe ba tanke haat, nune’e ohin ami bele uza,” Adriano Maria dos Reis hateten.
Nia informa, horisehik, Governu hosi parte relevante sira mai ho kareta haat mak ense ona bee-moos litru rihun 70 iha tanke bee nian ne’ebé prepara iha fatin ne’e.
“Horiseik mai enxe litru rihun 70 ba tanke haat maibé ohin dadeer hotu kedas, tanba nesesidade barak no iha dapur mós araska ba bee. Nune’e, ohin, sira han tarde,” nia dehan.
Jornalista: Osória Marques
Editór: Cancio Ximenes
