DILI, 07 abril 2021 (TATOLI)—Gabinete de Apoio à atividade do Conjuge do Presidente Repúblika (GAAC-PR), ohin, hamutuk ho Rede Feto, Komisaun Sadia no Plan Internasional kontinua halo asaun solidariedade hodi fó apoiu nesesidade bázika ba vítima dezastre naturál ne’ebé hela iha sentru evakuasaun Tasi Tolu.
Notísia Relevante: Vítima dezastre naturál Bairro João Paulo II husu apoia ai-han
“Ekipa GAAC-PR servisu hamutuk ho parseiru sira, ohin kontinua buka tuir maluk sira ne’ebé presiza apoiu hosi ita. Maibé, horisehik no ohin, bainhira ami halo vizita hodi fó kontribuisaun ba sira, barak mak presiza biti, sumasu no manta,” Espoza Prezidente Repúblika, Cidália Nobre Lopes Mouzinho Guterres, hateten ba jornalista sira, iha João Paulo II, Tasi Tolu, kuarta ne’e.
Espoza Prezidente Repúblika hatutan, hafoin kontribui fahe nesesiade bázika ba vítima dezastre naturál iha Tasi Tolu, iha terrenu ekipa mós identifika tan problema balun mak iha sentru evakuasaun ne’e vítima sira mós susar bee-moos.
“Espera katak Governu bele rezolve lalais. Tanba inundasaun ne’e la’ós iha Tasi Tolu de’it maibé iha fatin barak ne’ebé afeta ba inundasaun ne’e, bee-moos laiha. Ho ne’e, Governu bele atende lalais nesesidade bázika ba vítima sira maibé importante mak tenke asegura uluk lai iha fatin seguru no di’ak. Depois, mak ekipa halo observasaun vítima nia uma, karik uma ne’ebé mak sei di’ak bele fila no hadi’a,” nia dehan.
Iha biban ne’e, Espoza PR hato’o agradesimentu ba responsável tanba oferese-aan hodi akumula dadus no halibur komunidade, hodi oferese fatin ba maluk vítima sira hodi hela. Nune’e mós, agradese ba timoroan sira-ne’ebé fó apoiu ba vítima sira tantu hosi rai-liur, rai-laran, individu, grupu, organizasaun sosiedade sivíl hodi lolo liman ba malu fó apoiu ba vítima dezastre naturál.
Nia informa, horisehik Gabinete de Apoio à atividade do Conjuge do Presidente Repúblika (GAAC-PR) fó apoiu umanitáriu ba refujiadu sira iha sentru evakuasaun iha Konventu Madre SSPS Becora, Komunidade Filha de Maria Auxiliadora (FMA) Balide-Dili no ohin iha Tasi Tolu, maibé fatin sira-ne’e hotu-hotu susar ba bee-moos.
“Kuaze fatin barak mak ami vizita, ai-han sufisiénte maibé bee-moos mak susar tanba bee-moos mak hodi uza ba tein, haris fatin no haris nian. Vítima balun presiza biti, sumasu no manta. Agora, ita salva maluk sira hosi inundasaun maibé ita bele hetan moras diarea no moras sira seluk,” nia dehan.
Entretantu, Koodenadór Grupu II hosi João Paulo II, iha Aldeia 12 de Outubru, Florentino Martins, apresia ho apoiu umanitáriu hosi Gabinete Apoiu Konjuge Prezidente Repúblika ne’ebé oferese ona nesesidade bázika ba refujiadu sira mak hanesan foos, mina, susu-been, energen, indomilk, sabaun, pepsodent, masin, masin-midar, biskuit, biti, sumasu, manta no seluk tan.
“Nu’udar povu afetadu nafatin agradese no tulun boot ne’ebé ami hetan hodi bele responde netik ami família hotu-hotu nia nesesidade, ne’ebé daudaun ne’e evakua iha Grupu II Tasi Tolu,” Koordenadór ne’e hateten.
Koordenadór ne’e informa, daudaun ne’e vítima dezastre naturál ne’e evakua no refujia iha Grupu II hosi João Paulo II Tasi Tolu ne’e, iha xefe família hamutuk 91 ho populasaun hamutuk 491.
Notísia Relevante: Espoza PR fó apoiu ba vítima dezastre naturál iha FMA Balide
Jornalista: Osória Marques
Editór: Cancio Ximenes
