DILI, 07 abríl 2021 (TATOLI)-Ekipa Governu liuhosi Sekretária Estadu Protesaun Sivíl (SEPS), Ministériu Administrasaun Estatál (MAE) ho parseiru nasionál no internasionál, daudaun ne’e, kontinua rekolla dadus família afetadu dezastre naturál iha Munisípiu Dili.
“Ita harii ona grupu 32 ba iha suku hotu iha area jurisdisaun Dili nian ne’ebé komesa identifika uma-kain sira ne’e sofre dezastre naturál,” Sekretáriu Estadu SEPS, Joaquim Gusmão, hateten ba jornalista sira, kuarta ne’e, iha edifísiu SEPS, Caicoli, Dili.
Nia hateten, ho dadus ne’ebé ekipa rekolla sei apoiu emerjénsia no rekuperasaun tuir mai hodi bele hadi’a uma ne’ebé hetan estragu totál.
Nia agradese ba kooperasaun hotu ne’ebé la’o ho liña ministerial no parseiru nasionál ho internasionál hodi kolabora ho SEPS forma ekipa konjunta hodi hala’o atuasaun servisu sira iha terrenu.
Tuir dadus provizóriu hosi SEPS daudaun ne’e iha família uma-kain 2375 ho totál ema 9779 mak evakua hosi sira-nia uma ba hela iha sentru evakuasaun hamutuk 18 iha kapitál Dili.
Jornalista : Nelson de Sousa
Editór : Francisco Simões
