DILI, 09 abríl 2021 (TATOLI)—Estadu Unidu Amérika (EUA), liu hosi Ajénsia Internasionál ba Dezenvolvimentu Estadu Unidu-nian (USAID), oferese rihun $100 ba Governu Timor-Leste (TL), atu bele tulun vítima inundasaun ne’ebé akontese iha 4 abríl tinan ne’e.
Fundu hosi USAID ne’e, oferese direta hosi Embaixadór EUA iha TL, Kevin Blackstone, ba Governu TL liu hosi Sekretáriu Estadu Protesaun Sivíl (SEPS), Joaquim Gusmão iha eskola Ensino Secundario Geral (ESG) 4 setembru UNAMET, Balide, sesta ne’e.
Notísia relevante:Governu mobiliza apoiu internasionál hatán impaktu hosi inundasaun
“Ita-nia ekipa misaun EUA iha TL ne’ebé serbisu lalais kedan hodi disponibiliza fundu ida-ne’e, atu bele apoia Timoroan-sira iha tempu difísil. Povu Amerikanu iha tradisaun tempu naruk, oinsá bele apoia ninia maluk-sira ne’ebé presiza tulun,” Kevin Blackstone, hateten iha serimónia entrega.
Diplomata ne’e dehan, fundu ne’ebé EUA oferese hein katak, bele tulun maluk afeitadu-sira hodi rekopera hosi situasaun ne’e.
“Ha’u hakarak espresa ha’u-nia profunda sentidu kondolénsia ba família vítima, ha’u-nia solidariedade ba Timoroan-sira ne’ebé lakon ona sira-nia uma no sasan durante inundasaun,” espresa solidariedade.
Embaixadór ne’e informa mós katak, desde akontesimentu forsa Navál EUA iha TL oferese kedan apoiu ba Cruz Vermella no Ajénsia protesaun sivíl TL, ohin oferese tan kama ba refujiadu-sira iha eskola Ensino Secundario Geral (ESG) 4 setembru UNAMET, Balide.
Iha fatin hanesan, Sekretáriu Estadu Protesaun Sivíl (SEPS), Joaquim Gusmão reprezenta Governu TL hato’o agradesimentu ba povu Amerikanu ne’ebé ho laran luak bele responde pedidu Governu TL nian, liu hosi oferesimentu rihun $100 hodi hakmán sofrimentu ne’ebé povu TL enfrenta.
Tuir dadus provizóriu hosi SEPS, to’o kuarta 07 abríl, iha ema na’in-42 mak lakon vida hosi dezastre naturál iha territóriu nasionál.
Nune’e mós SEPS halo ona aprezentasaun iha reuniaun Konsellu Ministru kona-bá pontu situasaun impaktu hosi inundasaun ne’ebé provoka hosi siklone tropikál Seroja katak, levantamentu ba dadus, rejista ona ema hamutuk 10.000 mak lakon uma iha Dili.
Entretantu, iha 08 abríl Konsellu Ministru (KM) deside aprova mobilizasaun apoiu internasionál hodi hatán ba impaktu inundasaun ne’ebé akontese iha 04 abríl.
Ohin mós VIII Governu Konstitusionál lideradu hosi Primeiru-Ministru (PM), Taur Matan Ruak, informa ba Parlamentu Nasionál katak, ezekutivu presiza orsamentu ho montante millaun $200 hodi responde ba dezastre naturál iha territóriu nasionál.
Notísia relevante:Governu presiza millaun $200 responde dezastre naturál
Jornalista: Tomé Amado
Editór: Cipriano Colo
