DILI, 09 abríl 2021 (TATOLI)—Hospital Nacional Guido Valadares (HNGV) enfrenta problema boot-liu durante inundasaun iha 4 abríl maka eletrisidade dezligadu no afeta tebes ba pasiente-sira iha sala Unidade Kuidadu Intensivu (ICU), no mós iha sala inkubadór perinatolojia.
Unidade Kuidade Intensivu (ICU) ho nia funsaun atu bele halo tratamentu ba pasiente ne’ebé ho kondisaun moras grave no krítiku-liu, nune’e mós sala inkubadór perinatolojia nu’udár fatin própriu atu salva bebé-sira ne’ebé moris prematura no presija atu asegura hosi malirin, no infesaun, presija eletrisidade.
Notísia relevante:Inundasaun estraga zelera atu rai AstraZeneca iha KBP
“Ahi mate, família pasiente-sira mós preokupa no hirus, maibé ami esplika didi’ak ba sira katak, inundasaun ne’e ita labele halo buat ida, enkuantu jeradór mós at hotu tanba bee tama,’’ Diretór Administrasaun Finansa no Lojístika, HNGV, Duarte Marçal de Araújo, hateten ba jornalista-sira iha HNGV, sesta ne’e.
Pasiente ne’ebé iha sala ICU hamutuk na’in-lima, no bebé iha inkubadór perinatolojia hamutuk na’in-haat ho kondisaun di’ak hotu.
“Ita konsege rezolve situasaun ne’e ho fuan boot, kalma no pasiénsia ikus-mai pasiente-sira di’ak hotu,” nia esklarese.
Nia mós informa katak, HNGV iha duni jeradór boot ho kapasidade 250 Kwh, maibé oras ne’e daudaun jeradór ne’e aat hela tanba bee tama no la konsege salva.
“Parte lojístika HNGV kontaktu kedan ba EDTL maibé la responde tanba ahi taka totál, entaun ami komprende situasaun ida-ne’e,” Diretór ne’e subliña.
Ho situasaun ne’e, parte lojístika esforsu nafatin, iha loron tuir-mai konsege hetan tulun hosi pesoál EDTL, hodi hadi’a jeradór ne’ebé bee tama no funsiona hikas durante EDTL la funsiona kuaze oras 24.
“Jeradór ita halo ona manutensun, no di’ak ona. Ami sei halo fatin di’ak hodi asegura jeradór ne’e. Ita garante katak, bainhira ahi mate sei uza ona,” nia esplika.
Tuir planu, iha 2022 HNGV sei hola jeradór ho kapasidade boot liu tan, ne’ebé bele kobre HNGV tomak hodi asegura ekipamentu-sira bainhira EDTL falla, tanba jeradór ne’ebé iha, uzadu kuaze tinan ualu ona.
Kona-bá fasilidade no ai-moruk iha HNGV laiha problema, tanba valeta hadi’a ona, maibé iha karreta tolu mak bee hoban no oras ne’e halo ona manutensaun iha ofisina.
Jornalista: Felicidade Ximenes
Editór: Cipriano Colo
