DILI, 10 abril 2021 (TATOLI)—Koordenadór Forsa-Tarefa ba Prevensaun no Mitigasaun Surtu COVIDD-19, Rui Maria de Araújo informa, ohin, deteta tan kazu foun hamutuk 61 no kazu ativu hamutuk 531.
Notísia Relevante: COVID-19: kazu foun 70, rekoperadu 48 no atuál 515
Nia hatutan, hosi kazu foun 61 ne’e, na’in-54 iha Munisípiu Dili, na’in-lima (5) iha Ermera, na’in-ida (1) iha Covalima, Bobonaro deteta kazu foun ida (1) no kazu ida-ne’e halo viájen hosi Dili iha 6 abril 2021, Ainaro deteta tan kazu pozitivu ida (1) no kazu pozitivu ne’e halo viájen hosi Dili iha 3 abril 2021, Ermera deteta tan kazu pozitivu lima (5) no kazu hirak ne’e halo viájen hosi Dili.
“Hosi kazu foun 61 ida-ne’e mane na’in-30 no feto na’in-31. Hosi total kazu detetatu foun ne’e sintomátiku na’in-rua (2) no asintomátiku na’in-59. Ohin, kazu rekuperadu 45 no kazu ativu 531,” Rui Maria de Araújo hateten liuhosi komunikadu imprensa ne’ebé Agência Tatoli asesu, sábadu ne’e.
Koordenadór ne’e informa, totál pedidu autorizasaun esepsionál atu sai hosi serka sanitária iha Munisipiu Dili iha 9 abril hamutuk hotu 219 no sekretariadu CIGC responde hotu kedas maibé pedidu 15 la prenxe kritériu tuir Rezolusaun Governu.
Aleinde ne’e, nia apela ba populasaun Timor-Leste tomak liuliu iha kapitál Dili no Munisípiu sira-ne’ebé afetadu ho inundasaun ne’e, uza meiu hotu ne’ebé iha atu hadook-aan hosi kontájiu moras COVID-19 liuliua uza nafatin máskara no fase liman beibeik ho sabaun ka dezinfetante ruma.
“Husu ba populasaun ne’ebé provizóriamente tenke hela iha sentru evakuasaun sira, atu kolabora ho ekipa konjunta saúde, hodi foti amostra ba análize laboratóriu. Ba populasaun ne’ebé la afetadu hosi efeitu inundasaun, husu respeita nafatin regra sira ne’ebé Governu hatuur ona atu prevene moras COVID-19 da’et ba-mai,” nia apela.
Jornalista: Hortencio Sanchez
Editór: Cancio Ximenes
