DILI, 10 abríl 2021 (TATOLI)—Komandu FALINTIL-Forsa Defeza Timor-Leste (F-FDTL) liuhosi Komponente Apoiu Servisu (CAS) Metinaro, Dili, ohin, monta ona kuzina movel hodi tein hahan tasak atu bele fornese ba abitante sira liuliu vítima dezastre naturál ne’ebé hela besik iha Lagoa Tasi-Tolu, Dili.
Notísia Relevante: Komandu F-FDTL Sei Fahe Karreta Kuzina Ambulante Ba Kada Komponente
Udan boot ne’ebé akontese iha sábadu-domingu (03-04/04) ne’ebé hamosu inundasaun, halo Lagoa Tasi Tolu to’o agora udan no tasi-been seidauk maran inklui laiha dalan atu asesu ba komunidade sira-nia hela fatin, no komunidade iha área refere ba-mai ho bero kiik-oan ne’ebé fasilita hosi servisu Bombeiru no bero peskadór sira-nian.
Xefe Estadu Maiór Jenerál (F-FDTL), Tenente Jenerál Lere Anan Timur, hateten servisu liña ministéirál ho F-FDTL apoiu malu hodi haree nesesidade populasaun ne’ebé refujiadu no afeta hosi dezastre naturál liuliu inan isin-rua, labarik, katuas ho ferik no ema ho defisiénsia presiza tratamentu saúde ho hahan.
“Ho koordenasaun inter-ministériál, ami mai iha ne’e monta kuzina movel fó apoiu ba komunidade sira-ne’ebé sai afetadu iha Lagoa Tasi Tolu,’’ Tenente Jenerál Lere Anan Timur hateten ba jornalista sira iha Tasi Tolu, Dili, sábadu ne’e.
F-FDTL daudaun ne’e monta ona kuzina movel rua, hahú funsiona no sei monta tan rezerva rua atu bele fó apoiu ba komunidade sira. Kuzina movel ne’e ninia aparelu nu’udar karreta, iha laran kompleta ho fasilidade dapur nian ne’ebé antes ne’e nasaun Xina mak fó apoiu ba F-FDTL.
Membru F-FDTL feminina nu’udar tékniku ne’ebé preparadu mak tein hodi prepara hahan tasak iha parte dadeersan matabixu, han meudia no kalan nian hodi atende no fornese komunidade afetadu no vuneravél hanesan inan isin-rua, labaik, ferik ho katuas, no ema ho defisiénsia.
Tuir observasaun Agência Tatoli nian iha terrenu, hahan ne’ebé militár femenina prepara tein iha kuziña movél mak hanesan etu, modo supermie, naan manu, sosis, maibé hahán ne’ebé tein depende ba menu kada loron la hanesan.
Entertantu, tuir observasaun Agência Tatoli iha Tasi Tolu besik Lagoa nian, hosi parte saúde Munsípiu Dili monta mós klinika movél rua hodi fó atendimentu saúde ba populasaun sira.
Iha fatin hanesan, komunidade ida-ne’ebé hela iha lagoa Tasi Tolu, Tome Soares, hato’o agradesimentu agradese ba apoiu Governu liuliu hosi F-FDTL hodi bele fó ona asisténsia ba sira iha tempu defisíl nia laran.
“Udan nee’ebé akontese foin lalais afeta tebes mai ami. iha ne’ebé bee iha ne’e nalihun hanesan Lagoa Tasi-Tolu agora sai ida de’it, ne’ebé halo dalan atu la’o ba-mai mós laiha tiha,” Tome Soares hateten.
Nia dehan, bee ne’ebé nalihun dadaun iha uma komunidade barak ne’ebé besik LagoaTasi Tolu nian seida’uk maran tanba ne’e balun tenke ba hela iha família sira-nua uma. Komunidade lubun ne’ebé hela besik iha Lagoa Tasi-Tolu, iha loron hirak liu ba hetan ona apoiu emerjénsia hanesan foos, biskuit ho sasán seluk hosi Governu no mós entidade sira seluk.
Notísia Relevante: F-FDTL harii tenda-10 ba vítima dezastre naturál iha Tasi-Tolu
Jornalista: Nelson de Sousa
Editór: Cancio Ximenes
