DILI, 12 abríl 2021 (TATOLI) – Komandu Polísia Munisípiu Dili kontinua asegura seguransa iha Sentru Izolamentu Vera Krús, Dili, hodi evita problema entre família no ekipa Lider Karizmátiku Kay Rala Xanana Gusmão, hodi foti mate isin pasiente Timor-oan ida ne’ebé mate deskonfia sofre COVID-19.
Notísia Relevante : Ministra Saúde husu Xanana atu fiar COVID-19
Tuir observasaun Agência Tatoli nian iha área Sentru Izolamentu Vera Krús nota katak Komandante PNTL Munisípiu Dili, Superintendente Xefe, Henrique da Costa, tuun direita hodi koloka membru Unidade Polísia Espesiál (UEP), Batallaun Orden Públiku (BOP), Taskforce Dili, Unidade Polísia Marítima (UPM) hodi asegura seguransa hale’u abitante sira ne’ebé halibur-malu iha área Sentru Izolamentu Vara Krús, inklui seguransa ba parte médiku sira.
Hosi observasaun ne’e nota mós Komandante PNTL Dili, Superintendente Henrique da Costa, husu ba membru sira atu mantein seguransa hodi hein desizaun Governu nian bele negosia ho di’ak kona-ba ejijénsia família ho Xanana nian ne’ebé husu atu lori mate-isin fila ba uma.
Ekipa PNTL konsege hakalma situasaun seguransa, bainhira karreta ambulánsia ida tenta tama ba sentru izolamentu, masa kompostu hosi ema liu-atus ida hakilar hodi ameasa motorista ambulánsia ida ne’ebé lori hela karreta tenke para nia viajen labele tama fatin izolamentu.
PNTL kontinua husu ba abitante inklui família sira ne’ebé hamutuk ho Xanana Gusmão atu kumpre nafatin regra distansiamentu sosiál no uza máskara hodi prevene-an hosi propagasaun COVID-19.
Daudaun ne’e, Xanana ho parte família sira lori ona kaixaun mutin ba Sala Izolamentu Vera Krús hodi hein desizaun Governu atu bele entrega mate isin ba família hodi hala’o serimónia funerál tuir kultura Timor-Leste.
Jornalista : Eugénio Pereira
Editór : Francisco Simões
