DILI, 12 abríl 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, kongratula grupu arte marsiál sira organiza malu hala’o limpeza jerál iha kapitál Dili hafoin hasoru dezastre naturál ne’ebé boot tebes.
“Hanesan Prezidente Parlamentu Nasionál, aproveita oportunidade ida-ne’e, atu manifesta ha’u-nia laran-haksolok no hakarak kongratula líder grupu arte-marsiál sira-nia partisipasaun no kontribuisaun direta hodi servisu hamutuk halo limpeza iha sidade Dili. Asaun ne’e demonstra imi-nia jestu solidariedade iha situasaun krítiku ne’ebé ita nia-nasaun hasoru,” Prezidente Parlamentu Nasionál informa liuhosi konferénsia imprensa, iha uma fukun, segunda ne’e.
Nia dehan, iha momentu defísil no krusiál sira hanesan ne’e, rai-lulik bolu hamutuk hodi hasees tiha kór ka grupu saidá de’it, kontinua unidade no oinsá tulun maluk sira-ne’ebé lakon família, hela-fatin no sasán.
Prezidente Parlamentu Nasionál louva ho inisiativa ne’ebé organiza hosi líder arte-marsiál iha Timor-Leste.
“Ita hotu he’in katak, ambiente servisu hamutuk entre grupu arte-marsiál sira, sei kontinua buras no forte liután iha futuru.
Nia subliña, Timor-Leste nu’udar Estadu Direitu no Demokratiku, tanba ne’e sidadaun no grupu hotu-hotu iha responsabilidade morál atu kontribui ba sosiedade ida-ne’ebé aberta, produtivu, justu, tolerante no dinámika.
Ho bazé ba ida ne’e, nu’udar líder másimu orgaun soberanu ida, apela no dezeja ba grupu arte-marsiál sira hakruk ba lei sira ne’ebé PN aprova, husu atu kontribui nafatin ba pás, estabilidade seguransa no kumpre nafatin protokolu Covid-19.
Parlamentu Nasional sei ezerse nia dever polítiku no morál atu halo esforsu hotu-hotu, fó importánsia ba pakote lejizlativa relevante sira seluk, ne’ebé sei kontribui hodi dinamiza liután grupu arte-marsiál sira, hodi iha koordenasaun di’akliu ho Governu no estruturada.
Nune’e mós organizadu no ida-ne’e sei permite no loke dalan ba membru arte-marsiál sira atu utiliza sira-nia potensialidade no abilidade tomak ho baze orientadu ba atividade desportiva iha nivél nasional, rejionál no mundial.
Aniceto akresenta, ho forma ida ne’e mak bele hetan konfiansa totál husi sosiedade ba grupu arte-marsiál hotu-hotu ne’ebé kontribui ativamente no direta ba dezenvolvimentu área desportiva iha Timor-Leste.
Iha opurtunidade ne’e mós, Prezidente Parlamentu Nasional, hakarak lori Parlamentu Nasional nia naran, hato’o parabéns no feliz aniversáriu ba arte-marsiál Kmanek Oan Rai Klaran (KORK), ne’ebé selebra kada tinan, iha 12 fulan-abríl.
Jornalista: Evaristo Soares Martins
Editór: Cancio Ximenes
