DILI, 14 abríl 2021 (TATOLI)—Líder karismátiku, Kay Rala Xanana Gusmão, kontinua toba iha estrada sentru izolamentu Vera Cruz, hodi hein desizaun Governu-nian, kona-bá destinu mate-isin Armindo Borges.
Tuir observasaun Agência Tatoli katak, Eis Prezidente Repúblika ne’e toba iha estrada-laran, ha-nahe ho biti ne’ebé homan hosi Tali-tahan, no falun an ho manta ariskadu.
Notísia relevante:Loron-tolu no kalan-rua, Xanana ho família matebian Armindo hein iha Vera Krús
Iha área ne’e, Xanana la toba mesak, maibé hetan seguransa másima hosi Korpu Seguransa Pesoál (CSP sígla portugés) ne’ebé armadu no nakonu ho vizilánsia.
Hosi parte rede-hun hale’u izolamentu, família matebian mós ha-latan an hamaluk Xanana Gusmão, atu atinji sira-nia ezijénsia hakarak lori duni mate-isin, ne’ebé mate ho COVID-19, hodi hakoi tuir kultura família-nian.
Konta ho ohin kalan, Xanana toba iha fatin ne’e ba kalan da-toluk, hahú hosi loron 12 no 13 abríl, ho mehi ida hakarak hetan rezultadu tuir preferénsia família-nian.
Antes ne’e, Xanana Gusmão, ne’ebé reprezenta família matebian, defende mós katak, nia maluk hakotu iis tanba moras komplikasaun, ne’ebé la’ós tanba COVID-19, tanba ne’e husu atu hasai mate-isin hosi sentru izolamentu, hodi entrega ba família no haloot tuir kultura Timór-nian.
Ohin iha tuku 8:00, Ministra Saúde (MS) Odete Maria Freitas Belo, bainhira vizita pasiente iha sentru izolamentu ne’e, informa katak, destinu kona-bá mate-isin hosi Armindo Borges, depende ba desizaun Konsellu Ministru (KM).
Maski nune’e, hafoin reuniaun KM iha parte lorokraik, Ministru Prezidénsia Konsellu Ministru, Fidelis Manuel Leite Magalhães, konsidera asuntu ne’e hanesan asuntu tékniku, ne’ebé entidade-sira hetan delegasaun kompeténsia hosi membru Governu, liuliu Primeiru Ministru (PM), Taur Matan Ruak hanesan Komandante Operasionál iha Sala Situasaun Sentru Integradu Jestaun Krize (SIJK) mak bele pronúnsia, la’ós KM.
Jornalista: Tomé Amado
Editór: Cipriano Colo
