DILI, 17 abril 2021 (TATOLI)—Governu liuhosi Sektretáriu Estadu Protesaun Sivíl (SEPS), ohin, hahú halo ona distribuisaun asisténsia umanitária liuhosi fahe sasán nesidade bázika ba ba vítima dezastre naturál iha Aldeia 12 de Outubru, Suku Comoro, Postu Administrativu Don Aleixo, Munisípiu Dili.
Sekretáriu Estadu Protesaun Sivíl, Joaquin Gusmão, hateten apoiu nesesidade báziku ne’ebé ohin distribui ne’e hanesan apoiu fiskál ba vítima dezastre naturál sira tuir dadus hosi Ministériu Administrasaun Estatál (MAE).
Distribuisaun ne’e, tuir nia, hala’o hafoin Komandu F-FDTL ensera no entrega misaun apoiu umanitáriu ne’ebé durante ne’e komandu no membru F-FDTL sira hala’o iha Tasi-Tolu ne’e ba Governu.
Notísia Relevante: Komandu F-FDTL ensera misaun apoiu umanitáriu iha Tasi-Tolu
“Distribuisaun ohin ne’e objetivu apoiu fiskal hosi Governu liuhosi protesaun sivíl tuir padraun polítika dezastre naturál nian, ne’ebé mak fó hela servisu ba protesaun sivíl hodi bele hala’o. Entaun, dadus ne’ebé ohin ita atu halo distribuisaun asisténsia umaintária ba vítima sira-ne’e hamutuk uma-kain 1.760,” Joaquin Gusmão,, hateten ba jornalista sira hafoin entrega apoiu umanitária ba vítima sira iha Lagoa Tasi-Tolu, Dili, sabadu ne’e.
Nia hatutan, apoiu asisténsia umanitária ne’ebé ohin fahe ba vítima sira-ne’e bazea ba dadus hosi MAE, tuir formuláriu ne’ebé MAE distribui ba lideransa komunitária sira hodi halo levantamentu dadus ba família afetadu dezastre naturál iha terrenu.
“MAE halo koordenasaun ho Sektretária Estadu Protesaun Sivíl, haree uluk dadus halo rezumu hetan uma-kain 1.760 hodi hetan aprovasaun mak ohin fó apoiu ba vítima sira,” nia dehan.
Sasán nesidade bázika sira-ne’ebé mak fahe ba vítima sira mak sasán sira-ne’ebé tama iha kategorai ai-han nian mak hanesan foos, mina, susu-been, biskuit no seluk tán, no sasán ida-ne’ebé tama iha kategoria la’os ai-han ne’e mak hanesan taxu, sana, bikan, kanuru no sasán dapur nian sira seluk.
“Apoiu ne’e ho objetivu atu vítima sira bele hahú fila-fali kontinua sira-nia moris loro-loron nian. Iha Tasi-Tolu ne’e sai hanesan sentru afetadu ida tanba ita haree katak uma barak agora dadaun aat, komunidade labele hela iha sira-nia uma. Maibé oinsá komunidade atu hela ne’e Governu nia kompeténsia maibé Protesaun sivíl papél mak desde akontese dezastre naturál halo kedas salvasaun ba ita-nia populasaun ne’ebé mak vulnerável tebes hanesan ferik-katuas, labarik sira,” nia hatetetn.
Apoiu ne’ebé ohin distribui ne’e maske tarde uitoan, nia dehan, maibé sasán ne’ebé Governu distribui ne’e tenke to’o vítima sira-nia liman tanba informasaun ne’ebé SEPS hetan katak iha vítima balun la hetan apoiu no balun hetan apoiu to’o ohin loron, entaun SEPS ohin fahe ne’e hotu-hotu tenke hetan.
“Ha’u lori Governu nia naran, ha’u hakarak husu deskulpa tanba sasán ne’e ami fahe tarde uitoan. Maibé, ami hatene katak antes ne’e ita-boot sira hetan apoiu sira seluk hosi doadór sira, maibé ida-ne’e mak jestu Governu nian fó ba ita-boot sira,” nia dehan.
Sekretáriu Estadu Protesaun Sivíl, Joaquin Gusmão, sasán nesesidadé bázika ne’ebé fó apoiu ba vítima sira-ne’e la’ós hosi Governu mesak de’it maibé apoiu hosi parseiru sira hanesan Embaixada sira, ajénsia espesializada Organizasaun Nasaun Unida (ONU-sigla inglés) nian, ONG internasionál sira no hosi setór privadu sira.
“Ida ne’ebé mak fó tuir ita-nia sentru operasaun dezastre nian ne’ebé mak situadu iha ita ninia protesaun Sivíl. Ami espera katak ho apoiu ida-ne’e, ita-boot sira bele kontinua moris ba future. Bele neineik maibé hamutuk ita bele ultrapasa tiha ita-nia krize dezastre naturál ida-ne’e,” nia dehan.
Notísia Relevante: SEPS distribui ona apoiu emerjénsia ba família 2.000 iha Dili
Jornalista: Arminda Fonseca
Editór: Cancio Ximenes
