DILI, 18 abríl 2021 (TATOLI)—Ekipa saúde hala’o teste swab ba família matebian Armindo Borges, ne’ebé hakotu iis ho COVID-19, iha 12 abríl tinan ne’e.
Diretora saúde Munisípiu Dili, Agostinha Segurado hamutuk ho ekipa pilár II no III, buka konvense família matebian ne’ebé antes ne’e rezultadu pozitivu COVID-19, hodi lori ba izolamentu, maibé la koopera, nune’e ekipa deside halo swab fila-fila ba família hamutuk na’in-tolu.
Notísia relevante:MS preokupa ema na’in-rua pozitivu COVID-19 livre hela
”Ita-nia objetivu ohin hakarak halo aprosimasaun ba sira-na’in rua ne’ebé pozitivu antes. Ita hakarak salva sira na’in-rua ba iha fatin izolamentu. Maibé ita haree katak, família rasik lakohi koopera. Ida-ne’e sira-nia direitu no ami pasiénsia nafatin hakarak hamrik hanesan autoridade saúde, preokupa ba ema nia saúde,” Agostinha Segurado hateten ba jornalista-sira iha Sentru Saúde Comoro, domingu ne’e.
Nia informa katak, ekipa saúde konsege halo negosiasaun hodi konvense família matebian, ikus mai na’in-tolu anteriormente ne’ebé teste ona mak halo fila-fali teste.
Iha 12 abríl, ekipa saúde foti ona amostra hosi membru família matebian na’in-tolu no hosi na’in-tolu ne’e, na’in-rua pozitivu, maibé seidauk submete ba izolamentu.
Família matebian hela iha Aldeia moris foun, Suku Comoro, Postu Adminsitrativu Dom Aleixo Munisípiu Dili.
Matebian Armindo Borges (47) haloot iha semitériu Kamalhout, Aldeia Badiak, Suku Manleuana, Postu Administrativu Dom Aleixo, Munisípiu Dili, iha 15 abríl.
Jornalista: Felicidade Ximenes
Editór: Cipriano Colo
