LIQUIÇA, 19 abríl 2021 (TATOLI) – Maske pandemia COVID-19 halo ema barak preokupa no obriga Estadu deklara Estadu Emerjénsia no Serka Sanitaria, maibé ba Edukasaun Munisípiu Liquiça kontinua kumpre orientasaun Ministériu Edukasaun hodi selebra ezame trimestre dahuluk, segunda ne’e.
“Ohin, Munisipiu Liquiça hahú ezame trimestre dahuluk bazeia ba orientasaun hosi Ministériu Edukasaun. Maske ezame trimestre dahuluk ne’e hala’o iha situasaun pandemia COVID-19, maibé buat hotu la’o ho di’ak,” diretór Edukasaun Munisípiu Liquiça, Zito António informa ba Agência Tatoli iha Liquiça.
Notísia Relevante : MEJD distribui rezumu matéria primeiru periodu ba estudante 1.170
Nia dehan, tanba ezame hala’o iha situasaun pandemia COVID-19, maka tenke kumpre nafatin medida prevensaun COVID-19 nian, hanesan distánsia fízika, uza máskara no estudante ho profesór-sira tenke fase-liman ho sabaun beibeik.
“Maneira ezame ne’ebé ohin eskola-sira halo ba alunu-sira maka matéria ezame iha pergunta lima (5) no mestre-sira hakerek iha kuadru depois estudante-sira fó resposta iha folio ne’ebé prepara ona,” nia esplika.
Informasaun seluk ne’ebé Servisu Edukasaun Munisípiu Liquiça simu hosi Eskola Santo Inacio de Loiola, Casait, katak sira-nia parte la bele realiza ezame trimestre da-uluk ne’e tanba sira-nia estudante 80% mai hosi Dili.
“Serka Sanitáriu iha Dili halo estudante-sira labele tuir ezame normal, maibé eskola bele iha mekanizmu atu fó ezame ba alunu via online ka seluk tan ne’ebé eskola bele halo bazeia ba situasaun,” Zito António informa.
Jornalista : Hortencio Sanchez
Editór : Francisco Simões
