DILI, 21 abríl 2021 (TATOLI)—Funsionáriu kompostu hosi Juís, ofisiál justisa, auditór, assesór no tékniku hosi Tribunál Rekursu (TR) no mós Tribunál Distritál Dili (TDD) hamutuk 200, simu ona vasina AstraZeneca, iha kuarta ne’e.
Vasinasaun ne’e realiza hosi pesoál saúde-sira bazeia ba pedidu hosi Prezidente Tribunál Rekursu (PTR), Deolindo dos Santos ba Ministériu Saúde (MS).
Notísia relevante:Pesoál liña frente 1.080 simu ona vasina AstraZeneca
“Ema ida-idak mak sei deside, maibé atu seguru presiza hetan duni vasina. Tanba ne’e, ha’u enkoraja funsionáriu-hotu atu vasina tanba importante tebes hodi aumenta imunidade kontra COVID-19,” Deolindo dos Santos, hateten ba jornalista-sira iha edifísiu TR Caicoli, Dili.
Nia dehan, funsionáriu-sira presija duni atu simu vasina tanba durante implementasaun Estadu emerjénsia no serka sanitária, serbisu Tribunál kontinua funsiona normál, hodi halo atendimentu públiku ba julgamentu kazu urjente no kontinuasaun.
Deolindo dos Santos mós hato’o ona pedidu ba MS atu bele fó mós vasina ba juís no funsionáriu-sira iha Tribunál Distritál Suai, Baucau no RAEOA.
Iha fatin hanesan, juís Administradór TDD, Afonso Carmona, hateten nia parte hakarak simu vasina tanba importante tebes atu aumenta imunidade hodi kontra COVID-19.
Dadus hosi Ministériu Saúde (MS) hatudu katak, to’o ohin loron, vasina ona ema 11.000-resin iha nível nasionál.
Jornalista: Nelson de Sousa
Editór: Cipriano Colo
