DILI, 21 abríl 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, to’o loron segunda (19/04) finaliza ona pagamentu Cesta Bázika ba kompañia lokál hamutuk 94 ho montante $25.079.090.
Pagamentu mai hosi pedidu hamutuk 96 ne’ebé MF simu no konsege selu ona kompaña 94, hela de’it pedidu pagamentu rua hosi Sentru Lojíztika Nasionál (CLN, sigla portugés) mak seidauk selu.
Tuir nota ne’ebé Agência TATOLI asesu iha kuarta ne’e, pagamentu 94 kompostu hosi Ministériu Turizmu, Komérsiu no Indústria (MTKI) 50, Sekretária Estadu Kooperativa (SEKoop) 24, no CLN 20.
“Sekretariadu Tékniku Fundu COVID-19, to’o ohin loron seidauk simu pedidu pagamentu hosi Ministériu Agrikultura no Peska (MAP), tanba ne’e sei kontinua serbisu hamutuk ho ministériu implementadór sira atu aselera pagamentu ba kompaña ne’ebé mak fornese ona ai-han ba programa Cesta Bázika,” refere nota.
Notísia relevante: MAP submete pedidu pagamentu Cesta Bázika kompañia 17 ba MF
Maski nune’e, Sekretariadu Tékniku sei prosesu no realiza pagamentu tuir regra ne’ebé vigora, bainhira dokumentu pedidu pagamentu kompletu, loos no prienxe ona rekezitu pagamentu tuir lei haruka.
Aleinde ne’e, kompañia sira hotu tenke kumpre dever hodi selu impostu rendimentu (income tax) 0,5% hosi totál rendimentu konforme Lei Tributária haruka no aprezenta resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál.
Sekretariadu mós nakloke ba pergunta hosi kompañia fornesedór ka presiza informasaun kona-ba asuntu impostu, ne’ebé bele kontaktu Autoridade Tributária ka vizita portál
Karik kompañia fornesedór-sira iha pergunta ruma ka presiza informasaun liután kona-ba asuntu impostu, bele kontaktu Autoridade Tributária ka vizita portál https://attl.gov.tl/
Nune’e mós, pagamentu impostu bele realiza liuhosi mákina ATM P24, ne’ebé kontribuinte sira la presiza ba forma tan iha banku komersiál sira hanesan uluk.
Enkuantu, kompañia ne’ebé partisipa iha programa Cesta Bázika hamutuk 176.
Totál pagamentu CLN ba kompañia 20 hamutuk $1.944.811,70, kompañia rua ne’ebé seidauk simu pagamentu ho totál pagamentu $255.252,60, nune’e totál pagamentu ba CLN hamutuk $2.200.064,30, MTKI ba kompañia 50 ho totál pagamentu $10.635.966,50, SEKoop ba kompañia 24 ho totál pagamentu $12.498.312,50, nune’e, totál pagamentu ba kompañia 94 hamutuk $25.079.090.
Jornalista: Antónia Gusmão
Editora: Julia Chatarina
