DILI, 22 abríl 2021 (TATOLI)—Família hein hela mate-isin Olga Mendonça (61), ne’ebé hakotu-iis ho COVID-19, iha izolamentu Vera Cruz tuku 9:00 otl.
Família mós hein hela desizaun hosi Sala Situasaun Sentru Integradu Jestaun Krize (SIJK), kona-bá serteza ba fatin haloot mate-isin ne’ebé tuir família katak, antes ne’e ho istória moras tensaun no iis-boot.
Notísia relevante:SIJK ho família matebian Francisca Gama harii Cruz iha rate
”Durante ne’e matebian isin-manas oitoan, me’ar, iis-boot akompaña ho tensaun. Ne’e mak ami lori ba hasai raan iha klínika Foho osan-me’an ho rezultadu tensaun alta. Ho ida-nee mak ami lori ba HNGV iha 19 abríl, hodi halo tratamentu. Iha ne’ebá, teste swab ho rezultadu pozitivu COVID-19 no transfere kedan mai Vera Cruz,” Família matebian, Manuel João Mendonça hateten ba jornalista-sira iha sentru izolamentu Vera Cruz.
Maski matebian hakotu iis ho COVID-19, maibé família rekomenda ba SIJK atu haloot iha semitériu públiku Becusse, tuir protokolu saúde.
”Ami hein-hela desizaun hosi Governu, maibé ami hakarak atu haloot iha semitériu Becusse, tanba Metinaro dook liu no dala ruma oan-sira susar atu ba vizita rate. Ami sei entrega tomak ba ekipa saúde atu bele haloot tuir regra saúde-nian, naran katak hakoi besik iha Becusse,” nia sujere.
Rezidénsia matebian iha Suku Lahane Osidentál, Postu Administrativu Na’in-Feto, Munisípiu Díli ho oan hamutuk na’in-lima.
Oras ne’e daudaun, Timor-Leste rejista ona ema mate ho COVID-19 hamutuk na’in-tolu, mak hanesan Francisca Gama (44) nu’udár timor-oan dahuluk ne’ebé hakotu-iis iha tersa (06/04) dadeer iha sala izolamentu Ospitál Lahane, hakoi iha semitériu ne’ebé lokaliza iha postu administrativu Metinaro, munisípiu Dili.
Nune’e mós Armindo Borges (47) hakotu-iis iha domingu (11/04), tanba moras stroke no bazeia ba rezultadu teste swab ne’ebé ekipa saúde halo, hatudu rezultadu pozitivu COVID-19, no haloot iha semitériu Kamalhout, aldeia Badiak, suku Manleuana, postu administrativu Dom Aleixo, Munisípiu Dili, 15 abríl.
Ohin, Olga Mendonça (61), hakotu-iis ho COVID-19 iha izolamentu Vera Cruz, iha tuku 9:00 otl.
Notísia relevante:Mate-isin Armindo Borges haloot ona iha simetériu Manleuana
Jornalista: Felicidade Ximenes
Editór: Cipriano Colo
