DILI, 27 abríl 2021 (TATOLI)—Ministéiru Justisa (MJ) sei atribui rai Estadu iha Tibar, postu administrativu Bazartete, Munisípiu Liquiça ba Federasaun Taekwondo Timor-Leste, hodi bele harii sentru treinamentu.
“Diresaun Terras no Propriedade (DNTP) konfirma katak, parte Federasaun ba haree ona rai ne’e, bainhira submete relatóriu ha’u sei haree hodi halo prosesu atribuisaun,” Ministru Justisa, Manuel Cárceres da Costa, hateten ba jornalista-sira hafoin enkontru ho Primeiru Ministru (PM), Taur Matan Ruak, iha nia rezidénsia Faról, tersa ne’e.
Notísia relevante:Atleta Taekwondo 959 Tuir Ezame Nasionál
Governante ne’e mós aprezenta ona asuntu ne’e ba Xefe Governu durante enkontru, maski sei iha prosesu nia laran.
“Kona-bá rai nia luan seida’uk hatene tanba oras ne’e daudaun iha hela prosesu, bainhira to’o atribuisaun finál mak ita hatene,” nia subliña.
Tuir planu, sentru Federasaun Taekwondo ne’ebé sei harii, kompleta hanesan koléjiu hodi bele dezenvolve liu-tan talentu desportivu joven Timoroan-sira nian, hodi kontribui ba dezenvolvimentu.
Antes ne’e, parte Federasaun Taekwondo Timor-Leste mak husu atribuisaun rai hosi MJ no hetan apoiu hosi Embaixada Koreia Súl iha Dili.
Jornalista: Nelson de Sousa
Editór: Cipriano Colo
