DILI, 30 abríl 2021 (TATOLI)—Embaixadór Estadu Unida Amérika (EUA), Kevin Blacktone, sesta ne’e buka-hatene prioridade sira hosi Partidu Libertasaun Populár (PLP) nian iha governasaun VIII Governu Konstitusionál.
“Ami ko’alia kona-ba PLP nia prioridade sira, ko’alia mós kona-ba Primeiru-Ministru ne’ebé daudaun lidera hela Governu no prioridade sira. Enkontru ida-ne’e parte ida hosi ha’u-nia esforsu atu hasoru líder partidu polítiku hotu iha Timor-Leste, ida-ne’e duni mak esénsia hosi demokrasia,” Embaixadór Kevin Blacktstone, informa ba jornalista sira, sede PLP, Metiaut, sesta (30/04/21).
Embaixadór EUA ne’e laiha objetivu espesífika iha enkontru refere, maibé atu rona no aprende hosi partidu polítiku sira hodi servisu hamutuk atu fó moris di’ak ba timor-oan sira.
Tuir nia, EUA sempre apoia kualkér Governu ne’ebé eleitu ho livre liuhosi prosesu demokrátiku sira.
Nia dehan, iha tempu tuir mai sei hasoru malu ho Partidu Demokrátiku (PD) no partidu sira seluk ne’ebé eziste iha Timor-Leste.
“Estadu Unida Amérika sempre apoiu Governu ne’ebé mak eleitu ho lívre. Estadu unidu la apoiu partidu ida, maibé apoiu hotu-hotu ne’ebé servisu nu’udar timor-oan,” Kevin dehan.
Embaixadór EUA ne’e kompartilla ho Vise-Prezidente PLP, Abel Pires da Silva kona-ba valór demokrasia.
“Timor-oan sira bele livremente forma partidu no partidu sira bele hamutuk halo negosiasaun bele mós halo koligasaun atubele servisu ba timor-oan sira, tanba ne’e mak EUA apoiu Timor-Leste,” nia dehan.
Entretantu Vise-Prezidente PLP, Abel Pires da Silva, hateten vizita kortéjia ida-ne’e tanba Kevin nu’udar Embaixadór EUA foun iha Timor-Leste no ko’alia mós kona-ba situasaun jerál iha rai-laran.
Vise-Prezidente PLP agradese ba EUA ne’ebé apoia ona Timor-Leste iha kalamidade cheias no inundasaun ne’ebé akontese iha loron 4 abríl no espera kooperasaun rai-rua metin ba nafatin.
Purtantu, programa prioridade VIII Governu Konstitusionál mak hanesan mudansa ba progresu no bein-estár, kontinua ho dezenvolvimentu ho kapitál sosiál, kontinua ho dezenvolvimentu infraestrutura, kontinua dezenvolvimentu ekonomia, kontinua ho konsolidasaun governativa, boa governasaun no kombate korrupsaun.
Jornalista: Evaristo Soares Martins
Editór: Cancio Ximenes
