DILI, 30 abríl 2021 (TATOLI)—Ofisiál justisa hosi Ministériu Públiku (MP), husu ba Prokuradór Jerál Repúblika (PJR) foun, Alfonso Lopez, atu rezolve sira-nia osan retroativu tanba tinan tolu ona (2017-2020) seidauk simu.
“Desde 2017 to’o 2020 ami seida’uk hetan direitu ba retroativu. Antes ne’e, ami haruka karta dala-rua ba PJR sesante José Ximenes, maibé laiha resposta. Tanba ne’e, husu ba PJR atuál atu tau atensaun ba direitu ofisiál justisa-nian ne’ebé durante ne’e viola hosi PJR sesante,’’ Portavóz, Elsa Xavier, hateten ba jornalista-sira liu hosi konferénsia imprensa, iha edifísiu Prokuradoria Distritál Dili, sesta ne’e.
Notísia relevante: PJR foun presiza orienta majistradu MP halo inkéritu ho rigorozu
Nia esplika, tuir diploma Ministérial konjuntu entre Ministéiru Justisa (MJ) no Ministéiru Finansa (MF) dekreta ona ho diploma Ministérial konjunta númeru 67/2019, 5 dezembru, no fó-sai iha jornál repúblika iha 30 outubru 2019, ne’ebé ninia efeitu hahú iha 01 janeiru 2017 to’o oras-ne’e dadaun.
Elsa Xavier hatutan, Ofisiál justisa-sira iha Tribunál, Ministéiru Públiku no Defensoria Públika iha estatutu ida de’it mak dekretu lei númeru 19/2012, 25 abríl.
“Ofisiál justisa defensoria públika sira-nia direitu ba retroativu simu ona iha 2019 no Tribunál-nian simu iha 2020, tanba sa mak ami ofisiál MP seidauk simu to’o ohin loron,’’nia kestiona.
Ezijensia ofisiál justisa MP nian durante ne’e kona-bá osan retroativu iha janeiru to’o marsu 2021 simu ona, maibé hosi 2017-2020 seida’uk simu.
Nune’e mós, Ranerio Beram, hateten retroativu tuir estatutu MP iha artigu 63 númeru 3-4 fó biban ba funsionariu ofisiál justisa ne’ebé aplika rejime espesiál, bainhira iha rotasaun automatikamente saláriu aumenta. Ho nune’e, iha diploma Ministeriál konjuntu ninia-efetivu hahú 01 janeiru 2017 to’o ohin loron.
Tuir tabela saláriu báziku ofisiál justisa delizénsia maka $300 ho alojamentu $100, aumenta tan retroativu $40, nune’e totál $440.
Maibé, sáláriu báziku no retroativu ofisiál justisa delizénsia sei la hanesan ho ofisiál justisa ba adjuntu eskrivaun, eskrivaun direitu no xefi sekretária.
Oras ne’e daudaun, ofisiál justisa iha Ministériu Públiku hamutuk na’in 96.
Jornalista: Nelson de Sousa
Editór: Cipriano Colo
