DILI, 01 maiu 2021 (TATOLI) – Centro Nasionál Formasaun Professional Becora (CNFP) hetan alokasaun orsamentu jerál estadu 2021 purvolta rihun $729. Hosi totál orsamentu ne’e konsege ezekuta ona 25% iha primeiru semestrál.
Diretór CNFP-Becora, Lourenco da Silva Gusmão, informa ezekusaun primeiru semestrál nian sira konsege ezekuta tuir duni prosedimentu ne’ebé iha. Ne’ebé 25% bá fulan tolu; janeiru ho marsu nian kategoria di’ak. Ne’ebé ba segundu semestrál hahú abríl-juñu, tenke esforsa para bele atinje 50%.
“Ami nia ezekusaun OJE 2021 nian foin mak ezekuta de’it bá bens servisu no saláriu vensimentu, ba formasaun nian ami foin mak prepara konkursu públiku ne’ebé ninia orsamentu seidauk ezekuta,” Lourenco Gusmão hateten ba jornalista sira iha ninia edifísiu CNFP Becora, sábadu ne’e.
Nia afirma katak ezekusaun orsamentu primeiru semestrál ba kategoria bens servisu nian, sira halo ona kompras ba materiál eskritóriu, uniforme bá estudante, inklui mós limpeza.
Jornalista : Tomé Amado
Editór : Francisco Simões
