CCT oferese kafé uut ba vítima dezastre naturál

DILI, 07 maiu 2021 (TATOLI)—Koperativa Kafé Timor (CCT-siglá portugés), oferese kafé uut hamutuk pakote rihun 10 ho ekivalénsia tonelada lima ba Sekretária Estadu Protesaun Sivíl (SEPS), hodi bele distribui fila-fali ba família afetadu dezastre naturál.
Iha sesta ne’e, CCT oferese uluk kafé uut pakote rihun lima no semana oin sei oferese tan pakote rihun lima.
Notísia relevante:ACCT iha Timor-Leste entrega apoiu umanitáriu ba GAAC-PR
Apoiu ne’e entrega direta hosi Diretór Jerál CCT, Xisto Moniz Piedade ho Embaixadór Nova Zelándia iha Dili, Philip Hewitt, ba SEPS, Joaquim Gusmão, iha edifísiu SEPS, Caicoli, Dili, sesta ne’e.
Xisto Moniz Piedade, hateten parte CCT hetan fundu hosi embaixada Nova Zelándia (la temi montante), hodi bele fornese fila-fali kafé uut ba família afetadu, tanba iha Timor-Leste populasaun barak mak gosta konsumu kafé.
Iha fatin hanesan, SEPS, Joaquim Gusmão, agradese ba apoiu ne’e, atu bele distribui ba familia-sira ne’ebé presija duni.
“Iha pakote apoiu umanitáriu ne’ebé Governu deside fó ba komunidade afetadu, hanesan food item inklui kafé iha laran. Tanba ne’e, sei distribui fila-fali ba komunidade,” nia dehan.
Antes ne’e, CCT mós oferese ona kafé uut ba Parókia Balide, komunidade relijioza-sira iha Becora, Dom Bosco Comoro, hodi atende fila-fali ba família afetadu sira.
Jornalista: Nelson de Sousa
Editór: Cipriano Colo

