DILI, 17 maiu 2021 (TATOLI)—Timor-Leste no Estadu Unidu Amérika (EUA) sei asina akordu kontribuisaun finanseira ba objetivu dezenvolvimentu, ne’ebé parte rua sei reprezenta hosi Ministru Finansa, Rui Augusto Gomes no Diretór Misaun Ajénsia Estadu Unidu ba Dezenvolvementu Internasionál (USAID, sigla Ingles), James Wright.
Selebrasaun akordu bilaterál ne’e sei realiza iha tersa (18/05), iha salaun Ministériu Finansa (MF), Aitarak-laran.
“Kontribuisaun ne’e ho montante $17.900.000, hosi totál kontribuisaun estimadu $92.300.000, ba tinan-lima (2021 to’o 2025), ne’ebé sei aloka ba setór saúde, boa governasaun, no setór la’ós petrolíferu hanesan turizmu, agrikultura no ekonomia, ne’ebé konsidera potensiál atu diversifika ekonomia maibé seidauk dezenvolve ho di’ak iha pasadu,” refere nota imprensa ne’ebé Agência Tatoli asesu, segunda ne’e.
Serimónia ne’e tuir kedan ho lansamentu liña direta Alfándega (Customs hotline), ne’ebé sei permite públiku atu relata atividade suspeitu iha kualker oras tantu iha dadeer ka kalan liuhosi liga ba númeru gratuita 12200 ka relata online iha portál Autoridade Aduaneira, MF www.customs.gov.tl.
Hahú hosi tinan 2002, EUA oferese ona orsamentu ho montante millaun $500-resin hodi apoiu Governu Timor-Leste iha área ekonomia (turizmu no agrikultura) defeza, demokrasia no boa governasaun, protesaun sivíl no seguransa, saúde, edukasaun no programa interkámbiu sira.
Seremónia sei partisipa hosi Vise-Ministra Finansa, Sara Lobo Brites, Ministru Prezidénsia Konsellu Ministru, Fidelis Manuel Leite Magalhães, Ministru Koordenadór Asuntu Ekonómiku, Joaquim Amaral, Ministru Turizmu, Komérsiu no Indústria, José Lucas do Carmo da Silva, Ministru Agrikultura no Peska, Pedro dos Reis, Ministra Saúde, Odete Maria Freitas Belo, no Ministra Negósiu Estranjeiru no Kooperasaun, Adaljiza Albertina Xavier Reis Magno inklui Embaixadór EUA iha Timor-Leste, Kevin Blackstone.
Nune’e mós, partisipa hosi reprezentante hosi liña ministériu relevante ne’ebé durante ne’e serbisu hamutuk ho USAID hodi implementa atividade iha Timor-Leste inklui reprezentante sira hosi setór privadu, sosiedade sivíl no mídia.
Jornalista: Antónia Gusmão
Editora: Julia Chatarina
