DILI, 26 maiu 2021 (TATOLI)—Governu Austrália liu hosi Department of Foreign Affairs and Trade (DFAT), oferese silindru oksijéniu foun, hamutuk 84 ba Serbisu Autónomu Medikamentu no Ekipamentu Saúde (SAMES), ne’ebé sei utiliza iha sala izolamentu-sira.
Diretór aprovizionamentu SAMES, Francisco Borges, hateten SAMES halo esforsu hodi koopera ho parseiru hotu-hotu atu haree no prepara kondisaun ne’ebé di’ak, hodi responde númeru kazu pozitivu COVID-19, ne’ebé aumenta liu liu sira ne’ebé presiza atu hetan suplementu ba oksijéniu.
Notísia relevante:Guvernu Austrália apoiu millaun $15.5 ba Governu Timor-Leste
“Foin-lalais ita simu silindru oksijéniu foun hamutuk 84 kompleta kedan ho flow meter, ita sei uza própriu iha sala izolamentu. Semana ida-ne’e ita sei simu-tán silindru 100, ita sei organiza no koloka iha izolamentu-sira ne’ebé ita estabele ona,’’ Francisco Borges, hateten ba jornalista-sira iha knaar-fatin Kampung Alor, kuarta ne’e.
SAMES kontrata ona kompaña lokál ne’ebé fornese oksijéniu hodi haree silindru-sira, ne’ebé bele enxe fila-fali oksijéniu, nune’e kualkér tempu presiza bele uza.
Parte SAMES mós komunika ona ho diretór saúde munisípiu-sira, atu rekolla oksijéniu silindru-sira no transporta mai iha armazén nasionál, nune’e bele foti fali foun.
Nia dehan, oras-ne’e daudaun utilizasaun oksijéniu aumenta makaas, liu liu pasiente-sira ne’ebé uza ventiladór ka CPAP iha sala izolamentu Vera Cruz.
“Ezemplu pasiente ne’ebé uza ventiladór, silindru boot litru 40 ita uza de’it ba oras tolu. Bainhira pasiente ida ita halo multiplikasaun simples, hanesan pasiente ida uza ventiladór kada oras tolu nia presiza litru 40, entaun ita multiplika ba oras 24, ne’e aumenta makaas,’’ Francisco Borges, esplika.
Oras-ne’e daudaun, SAMES rejista katak, silindru ne’ebé disponível hodi utiliza hamutuk 800-resin, kompostu hosi silindru kiik no boot.
SAMES komunika ona ho Ospitál Nasionál Guido Valadares (HNGV sígla portugés) no Serbisu Saúde Munisípiu-sira atu halo pedidu adisionál ba fornesimentu oksijéniu, no mós pedidu alokasaun orsamentu adisionál hodi bele kobre ba oksijéniu, tanba SAMES mós kontrata ona kompañia ho valór orsamentu rihun $340 ba suplay jerál tinan ida.
Jornalista: Felicidade Ximenes
Editór: Cipriano Colo
