DILI, 26 maiu 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten liuhosi negosiasaun entre Governu Austrália no Governu TL, tinan ne’e Governu Austrália liuhosi Department of Foreign Affairs and Trade fó apoiu millaun AUD$20 ka millaun $15,5 ba Governu TL liuhosi mekanizmu Direct Budget Support.
Notísia Relevante: Timor-Leste no Austrália sei kolabora iha área desentralizasaun administrativa territoriál
Diretora Sekretariadu Tékniku Programa Nasionál Dezenvolvimentu Suku (ST-PNDS), Claudina Soares Pinto, hateten objetivu husi fundu ne’e atu tulun Governu Timor-Leste hodi hasa’e reziliénsia komunidade no rekuperasaun ekonómia relasaun ho impaktu hosi Pandemia COVID-19 ne’ebe daudaun ne’e Timor-Leste no mundu tomak enfrenta.
“Governu Austrália fó apoiu hodi hadi’a no halo kontrusaun ba ita-nia infraestrutura sira. Iha semana oin, ita sei iha asina akordu entre Governu Austrália no Governu Timor-Leste. Depois asina akordu ita kontinua kedas ho ekipa PNDS nian halo sosializasaun dahuluk ba nível munisípiu sira,” Claudina Soares Pinto, hateten ba Agência TATOLI, liuhosi telefónika, kuarta ne’e.
Ezekusaun fundu ne’ebé Governu Austrália fó apoiu ba Governu Timor-Leste, sei fahe ba parte rua mak millaun $10,5 sei ezekuta no implementa liuhosi PNDS hodi utiliza hadi’a infraestrutura ne’ebé hetan estragu hosi dezastre naturál no millaun $5 sei ezekuta liuhosi programa bolsa da mãe iha Ministériu Solidariedade Sosiál no Inkluzaun (MSSI) nia okos.
Hosi osan ne’e, Diretora Sekretariadu Tékniku PNDS hatete, tinan ida-ne’e PNDS utiliza atu bele implementa ba infraestrutura bázika ne’ebé hetan estragu hosi dezastre naturál hanesan estrada, ponte, no dreinajen iha suku hamutuk 245 ba territóriu nasionál.
Nia dehan, rezultadu negosiasaun ne’e sei aprezenta ba Konsellu Ministru hodi hetan aprovasaun, molok Governu rua asina akordu bilaterál hodi fasilita transferénsia fundu ne’e mai iha konta Tezouru Nasionál Ministériu Finansa Timor-Leste nian.
Antes ne’e, PNDS mós hetan ona apoiu hosi Governu Austrália ne’ebé hanaran fundu reziliénsia kooperasaun ekonómia ne’ebé mak ho montante kuaze millaun $4.7.
Hosi apoiu ne’e, PNDS ezekuta ona ba projetu 165 ne’ebé daudaun ne’e sei la’o hela to’o mai agora. Projetu ne’e iha menu indikasaun tolu mak água no saneamentu, kondiasaun dalan, ponte kiik no irigasaun agrikultura nian iha territóriu Timor-Leste.
Partisipa iha negosiasaun ne’e mak hanesan Governu Austrália, reprezenta hosi Embaixada Austrália iha Timor Leste, Governu Timor Leste reprezenta hosi Ministériu Finansa hanesan xefe de negosiasaun ho nia membru delegasaun sira maihosi MAE, MSSI no MNEC.
Jornalista: Osória Marques
Editór: Cancio Ximenes
