DILI, 27 maiu 2021 (TATOLI)-Ministru Asuntu Parlamentár no Komunikasaun Sosiál (MAPCOMS-sigla portugés), Francisco Martins da Costa Pereira Jerónimo, husu ba funsionáriu foun ne’ebé integra-an iha Agência Noticiosa de Timor Leste, Tatoli Institutu Públiku (Tatoli.IP), atu hala’o knar ho profisionál.
Notísia Relevante : Rekrutamentu kandidatu funsionáriu TATOLI bazea ba Planu Asaun Anuál
Agência Noticiosa de Timor Leste Tatoli.IP halo rekrutamentu ba funsionáriu foun hamutuk na’in-23, kompostu hosi na’in-17 nu’udar jornalista no na’in-neen hanesan funsionáriu administrasaun no finansas.
“Ha’u husu ita boot-sira ne’ebé agora integra ona mai iha Tatoli, labele haluha la’o tuir lei no meta ka prinsípiu planu estratéjiku dezenvolvimentu ne’ebé Tatoli rasik halo tiha ona hodi hatuur objetivu dezenvolvimentu sustentabilidade no komunikasaun sosiál nian,” Ministru Francisco Jerónimo hato’o lia hirak ne’e liuhosi nia diskursu bainhira sai oradór prinsipál ba semináriu ne’ebé Tatoli realiza ho tema “Promover a Informação para o Bem Comum”, iha Salaun Francisco Borja da Costa, Farol, Dili, kinta ne’e.
Nia esplika, hosi komunikasaun sosiál ne’e ko’alia kona-ba diversifikasaun komunikasaun sosiál. Hodi nune’e, diversifikasaun komunikasaun sosiál ohin loron Agência Tatoli hahú halo buat barak la’o ona, tanba ne’e hirak ne’ebé foin integra mai liu-liu jornalista-sira atu transmite informasaun ho loos, tanba diversifika ne’e atu informasaun ne’e tenke to’o lalais ba komunidade.
Membru Governu ne’e dehan, funsionáriu Tatoli.IP tenke servisu ho profisionalizmu tanba Tatoli.IP nu’udár instituisaun ida ne’ebé mak tutela diretamente ba iha Ministériu Asuntu Parlamentár no Komunikasaun Sosiál, ne’ebé estatál ninia karákter la hanesan ho Ajénsia sira seluk.
“Agência Estadu, loroloron servisu labele hanoin atu halo saida mak kontradís ho situasaun reál, maibé servisu bazeia ba programa dezenvolvimentu Estadu nian. Estadu nia hanoin ba ne’ebé, Tatoli mós implementa saida mak Estadu nia hanoin ne’e,” nia tenik.
Nia apela ba jornalista-sira liuliu sira ne’ebé sei destaka ba Munisípiu Baucau, Viqueque, Covalima, Bobonaro ho Rejiaun Administrativa Espesiál Oé-Cusse Ambeno (RAEOA), hala’o servisu iha munisípiu labele haluha hala’o jornalista nia misaun ne’ebé hakerek ona iha estatutu no lei Agência Tatoli nian.
“Bainhira ita komprende didi’ak ita-nia estatutu mak foin bele hala’o ita-nia funsaun loloos tuir Agência ne’e ninia objetivu, no sai jornalista la’ós fahe informasaun ne’ebé laloos, maibé tenke fó informasaun ne’ebé loloos atu nune’e públiku bele fiar,” nia hateten.
Nia tenik, Agência Tatoli tenke dezenvolve rai ida-ne’e liuhosi fó informasaun ne’ebé kredivel, no keta haluha aprende barak nune’e sai jornalista ne’ebé profisionál.
Iha fatin hanesan prezidente Konsellu Diretivu Tatoli.IP, Manuel Pinto hateten, Tatoli realiza semináriu ne’e ho razaun tanba jornada Agência Tatoli ninian foin dahuluk atu destaka nia jornalista-sira ba munisípiu, tanba ne’e sira tuir semináriu loron-rua, oinsá to’o munisípiu sira bele promove informasaun lokál sira ne’ebé mak serve ba interese komún ninian.
“Ha’u-nia esperansa mak sira na’in-lima iha munisípiu no RAEOA tenke promove informasaun lokál ba interese komún no nia xave mak halo promosaun ba informasaun lokál,” Manuel Pinto hateten.
Iha semináriu ne’e MAPCOMS hamutuk Konsellu Diretivu Tatoli.IP halo despedida mós ba jornalista na’in-lima ne’ebé sei destaka ba munisípiu-sira, liuhosi entrega kartaun identidade Tatoli nian ho livru estilu Tatoli.IP nian.
Jornalista : Arminda Fonseca
Editór : Francisco Simões
