DILI, 07 juñu 2021 (TATOLI)—Indonézia liuhosi Embaixada iha Dili fó apoiu nesesidade bázika ba vítima dezastre naturál iha Timor-Leste (TL), liu hosi Sekretária Estadu Protesaun Sivíl (SEPS).
Nesesidade bázika hirak-ne’e kompostu hosi foos, mina bimoli, super mie, susu-been, buiskuit ho sira seluk, ne’ebé konta ho valór osan $6.000.
Notísia relevante:SEPS kontinua verifika dadus ba apoiu materiál konstrusaun
Apoiu hirak ne’e parte Embaixada mak organiza hodi halibur sasán ne’ebé kontribui hosi empreza Indonézia-nian iha TL, kompostu hosi Banku Mandiri, Pertamina International Timor-Leste, no povu Indonéziu.
“Embaixada Indonézia hamutuk ho Diretór Ezekutivu Banku Mandiri, PITSA no povu Indonézia, ami fahe hela ai-han bázika atu bele hakmán netik família-sira iha situasaun kalamidade,” Embaixadór Indonézia iha TL, Sahat Sitorus, hateten ba jornalista-sira iha Caikoli, segunda ne’e.
Diplomata ne’e, agradese ba parseiru dezenvolvimentu-sira hanesan organizasaun Nasaun Unida (ONU), Austrália, Xina, Amérika, Japaun, Koreia Súl, no sira seluk ne’ebé durante ne’e fó asisténsia hanesan forma solidariedade.
Iha fatin hanesan SEPS, Joaquim José Gusmão dos Reis Martins, agradese ba Embaixada Indonézia, tanba kontinua ajuda vítima dezastre naturál iha TL.
“Ita agradese nop hato’o mós sentidu solidariedade ba Indonézia, tanba sira mós enfrenta hela situasaun hanesan liuliu iha Indonézia parte Leste hanesan Provínsia Nusa Tenggara Timur, no sira sei rekopera fali. Iha situasaun ne’e Indonézia nunka haluha atu ajuda TL,” Joaquim José Gusmão dos Reis Martins, hateten.
Sasán hirak-ne’e, SEPS sei distribui fila-fali ba vítima-sira ne’ebé seida’uk hetan.
Iha 10 abríl, Embaixada Indonézia mós oferese ona nesesidade bázika ba vítima dezastre naturál ne’ebé akontese iha 04 abríl 2021.
Família 1000-resin iha Dili hetan ona materiál konstrusaun
Iha fatin ne’e mós, Joaquim José Gusmão dos Reis Martins, fó-sai katak, família hamutuk 1000-resin hosi munisípiu Dili, ne’ebé afetadu ba dezastre naturál simu ona materiál konstrusaun.
Família 1000-resin ne’e hosi suku lima mak hanesan suku Bemori, Balibar, Comoro, Motael no tuir planu sei distribui tan ba iha Ataúro iha semana ne’e.
SEPS dadaun iha prosesu aprovasaun verifikasaun dadus ba família besik 4000 iha Dili, atu bele fó apoiu materiál konstrusaun.
Tuir dadus hosi Ministéiru Administrasaun Estatál (MAE) rejista família afetadu dezastre naturál iha territóriu nasionál hamutuk 33.280, númeru ne’e 27.622 hosi Dili.
Rezultadu verifikasaun iha Dili, iha uma afetadu hamutuk 25.928 kompostu hosi aat kamán 24.820, aat natón 553 no aat totál 554.
Jornalista: Nelson de Sousa
Editór: Cipriano Colo
