DILI, 08 juñu 2021 (TATOLI)-Prezidente Repúblika (PR), Francisco Guterres “Lú-Olo” sei lansa livru “Buibere Hamriik Ukun Rasik-An” iha Palásiu Prezidensiál, Dili, kinta (10/06/2021).
Sekretária Jerál Interina Organizasaun Populár Muller Timor (OPMT), Florentina Smith, klarifika katak OPMT hili loron 10 juñu, halo lansamentu ba livru “Buibere Hamriik Ukun Rasik-An” tanba liga ho situasaun ka akontesimentu Marabia ne’ebé akontese iha 10 juñu 1980, FALINTIL lansa atake ba kuartél Militár Indonézia sira iha Marabia-Dili nu’udár avizu ba mundu katak FRETILIN sei eziste nafatin no kaer metin hela rezisténsia, luta ba Povu Timor-Leste ukun rasik-an.
“Konteúdu hosi livru Buibere Hamriik Ukun Rasik-An ne’e liga ho istória tomak ne’ebé mak feto Timor-Leste fó aan durante ninia luta tomak liuliu iha akontesimentu Marabia nian,” Florentina Smith, haktuir ba jornalista-sira liuhosi konferénsia imprensa iha Salaun CNC (Centro Nacional Chega), Antigu Komarka, Balide, Dili, tersa ne’e.
Biban ne’e, Prezidente Repúblika sei fó omenajen ba eroína no eroi-sira asosiadu ho levantamentu Marabia nian no sei tatoli mós sira-nia istória barani ba ukun rasik-an ba ohin loron.
Iha kontestu komemora aniversáriu ba eventu istóriku importante Marabia maka Prezidente Repúblika, Francisco Guterres “Lú-Olo” hatán ba pedidu hosi komisaun organizadora atu lansa livru ” Buibere Hamriik Ukun Rasik-An” nu’udar obra ida ne’ebé sura kontribuisaun hosi feto-sira nia luta, iha frente tolu hanesan, Frente Armada, Klandestina no Frente Diplomátika.
“Iha lansamentu ba livru Buibere Hamriik Ukun Rasik-An ne’e, Prezidente Repúblika sei hatudu mós apresiasaun ba ekipa prodús livru ho sertifikadu louvór fundamenta ho Dekretu Prezidensiál ida ne’ebé sei públika iha Jornál Repúblika,” Florentina afirma tan.
Prezidente Repúblika mós sei kondekora saudoza Merita Alves “Bi Kiak” ho Orden Timor-Leste, ho títulu póstumu, tanba haree ba ninia kontribuisaun boot ba livru ne’e no mós ba luta libertasaun nasionál iha ai-laran durante períodu baze apoiu no nu’udár membru núkleu klandestina iha Kulu-hun, Dili, ho hahalok barani determinadu oioin, inkluindu simu-subar lider no komandante-sira no halo ligasaun entre frente Armada, Klandestina no frente Diplomátika.
Nia hatutan, komemorasaun ba levantamentu Marabia tama tinan-tinan iha programa Centro Nacional Chega (CNC) nian, nune’e CNC koopera ba serimónia tinan ida ne’e nian, ho transmisaun direta hosi RTTL, E.P. hodi kobre programa durasaun oras-ida atu povu tomak no maluk sira hosi rai-li’ur bele asiste ka akompaña hosi uma.
Iha fatin hanesan, Koordenadór Nasionál Asosiasaun Vítima Timor-Leste, Domingos Moniz hateten, tinan ne’e Timor-Leste enfrenta situasaun serka sanitária no konfinamentu obrigatóriu, entaun la hala’o atividade barak, maibé iha loron 10 juñu, sobrevivente-sira sei halibur malu iha monumentu Marabia hodi presta omenajen ba eroi-sira no loro-kraik mak partisipa iha komemorasaun loron Marabia nian iha Palásiu Prezidensiál Nicolau Lobato, Dili.
Serimónia komemorasaun levantamentu Marabia ho lansamentu livru istóriku no kondekorasaun ba eroína “Bi Kiak” iha Palásiu Prezidensiál sei hahú hosi tuku 16:00-tuku 18:00 Otl.
Jornalista : Arminda Fonseca
Editór : Francisco Simões
