DILI, 11 juñu 2021 (TATOLI)—Durante fulan maiu, Tribunál Distritál Dili (TDD) redús de’it prosesu krime 30 hosi prosesu pendente no prosesu foun hamutuk 1.667, tanba implementasaun serka sanitária (SS) no konfinamentu domisiliáriu jerál iha Estadu Emerjénsia (EE).
Juíz Administradór TDD, Afonso Carmona, hateten iha abríl liu-bá konsege redúz prosesu krime 104, hosi prosesu pendente no prosesu foun hamutuk 1.761.
Notísia relevante:TDD julga “deputada” Anabela Sávio
“Volume atu rezolve prosesu krime no sivíl menus, tanba aplikasaun regra Estadu Emerjénsia ne’eb’e limite sidadaun sira-nia prosesu iha Tribunál,” Afonso Carmona, hateten ba jornalista Agéncia Tatoli iha kn’aar fatin Mandarin, sesta ne’e.
Juíz Administradór ne’e sujere ba Governu atu halo mudansa ba regra ne’ebé impoin, nune’e sidadaun sira ne’ebé prosesu rejistadu iha Tribunál, bele marka prezensa, bainhira tribunál notifika.
Nia hatutan, durante serka sanitária no konfinamentu domisiliáriu iha fulan maiu, Tribunál atende de’it prosesu urjente, arguidu detidu, arguidu prezu, sumáriu no prosesu kontinuasaun atu asegura prova labele lakon no prosesu normál ba kazu ne’ebé Ministéiru Públiku submete antes ona, rejistu hodi marka sesaun julgamentu dahuluk labele realiza.
“Tanba ne’e prosesu-sira liga ba ema-nia direitu importante, halo mudansa iha regra, la’ós iha prosesu urjente de’it, maibé involve proseu normál,” nia sujere.
Tuir dadus ne’ebé, Agencia Tatoli asesu husi TDD, númeru kazu krime pendente hosi fulan maiu hamutuk 1.657, inklui prosesu foun 10 ne’ebé foin rejista, nune’e númeru aumenta ba 1.667.
Hosi númeru ne’e, konsege finaliza prosesu hamutuk 30, no daudaun-ne’e, kazu pendente iha fulan maiu iha de’it 1.637.
Kona-bá prosesu sivíl, pendente iha fulan maiu hamutuk 866, iha ne’e prosesu sivíl foun hamutuk ualu (8), nune’e kazu sivíl pendente aumenta ba 874.
Númeru ne’e, Tribunál konsege finaliza kazu sivíl hamutuk sanulu, no dadaun-ne’e kazu sivíl pendente hamutuk 864.
Tuir estatístika hosi TDD, tipu kazu krime ne’ebé rejista mak hanesan, ofensa integridade fízika, violénsia doméstika, korrupsaun ho sira-seluk no kazu sivíl mak hanesan problema rai, kontratu, regulasaun paternál ho sira-seluk.
Jornalista: Nelson de Sousa
Editór: Cipriano Colo
