Top

PNTL indentifika suspeitu na’in-tolu deskonfia harahun uma SVD Kuluhun

Membru PNTL hala’o patullamentu tama-sai bairru iha Dili, hodi tau matan ba movimentu komunidade durante situasaun serka sanitária, kuarta (12/05/21). Imajen TATOLI/António Gonçalves

DILI, 24 juñu 2021 (TATOLI)—Polisia Nasionál Timor-Leste (PNTL), munisípiu Dili, indentifika ona suspeitu mane na’in-tolu ne’ebé deskonfia forte envolve iha kazu tuda-rahun uma komunidade Misionáriu Societas Verbi Divini (SVD) iha suku Kuluhun, postu administrativu Cristo Rei, munisípiu Dili.

Komandante PNTL munisípiu Dili, Superintendente Xefe, Henrique da Costa, hateten suspeitu na’in-tolu ne’e foin mak halo notifikasaun no sei bolu sira atu presta deklarasaun iha tempu badak.

Notísia relevante:PNTL buka-tuir autór tuda-rahun uma SVD iha Kuluhun

“Ita-nia Ofisiál Polísia Suku (OPS) no Konsellu Polisiamentu Komunitária (KPK) indentifika ona ema na’in-tolu. Ita sei bolu mai hodi halo indentifikasaun klaru,” Henrique da Costa hateten ba jornalista-sira iha Komandu PNTL, Caicoli, kinta ne’e.

Maski PNTL simu ona keixa, maibé PNTL mós sei hein karta notifikasaun hosi Ministériu Públiku (MP) hodi ezekuta mandadu detensaun ba suspeitu-sira.

Konflitu tuda-malu entre grupu joven ne’ebé akontese iha Domingu (20/06) tuku 05:00 madrugada, bainhira jogu tasa Euro 2020 la’o hela, entre ekipa nasaun Portugál ho Alemaña, rezulta uma komunidade Padre SVD-sira nian hetan estragu grave.

Antes ne’e, Padre José Taiçain, SVD lamenta tebes ho aktu krime ne’ebé akontese, no husu ba PNTL atu investiga kazu ne’e hodi evita konfrontu labele akontese iha futuru.

Jornalista: Eugénio Pereira

Editór: Cipriano Colo

Publisidade

Leave a Reply

Latest Post

error: Content is protected !!