BAUCAU, 24 juñu 2021 (TATOLI)–Jerente To’os ba Moris Di’ak (TOMAK) munisípiu Baucau, Isac Ribeiro Ximenes, hateten, daudaun ne’e estabelese ona programa ai-han nutrisaun iha suku neen iha postu admistrativu Baucau villa.
Suku hirak ne’e mak hanesan Bucoli, Triloka, Gariuai, Uailili, Samalari, no Buruma, ne’ebé estabelese komponente rua hanesan agrikultura no nutrisaun.
“Nutrisaun nia objetivu importante mak oinsá atu hadi’a nutrisaun, ba komponente agrikultura iha postu Baucau villa ita promove ai-han hanesan fore-rai, lis no hare mean tamba bele kuda no fa’an iha merkadu hodi to’os-na’in sira hetan rendimentu no hadi’a sira-nia ekonomia uma-laran,” Jerente TOMAK dehan iha Admistrasaun postu Baucau, kinta ne’e.
Notísia relevante: Jerente TOMAK garante redús númeru mal nutrisaun iha Baucau
Programa ne’e foin iha faze dahuluk, ne’ebé implementasaun hahú ona iha tinan 2017, ba tinan sanulu ba oin iha munisípiu Baucau.
Tuir Responsável ne’e, iha postu Baucau sei realiza programa seguransa ai-han nutrisaun no agrikultura komersiál.
Nune’e, atu atinje meta ba seguransa ai-han, autoridade postu Baucau kolabora ho parseiru World Vision hodi estabelese grupu agrikultór hodi kuda ai-han nutritivu sira inklui informasaun nutrisaun kona-ba ai-han nutritivu saida mak inan-aman sira konsume no fó han ba oan sira.
Aleinde ne’e, iha mós grupu ne’ebé fó kréditu ba agrikultór sira hodi sosa nesesidade hanesan aihan no sasán uma-laran.
Ministériu Saúde (MS) rasik promove ai-han ba grupu tolu hanesan aihan haburas, fó forsa no protesaun.
Ai-han haburas kompostu hosi manutolun, naan, koto, fore-mungu no fore-rai, ai-han haforsa mak batar, hare, fehuk, talas, no ai-farina, enkuantu ai-han protesaun mak modo no aifuan sira.
Jornalista : Natalino Belo
Editora : Julia Chatarina
