DILI, 29 juñu 2021 (TATOLI)—Bankada Frente Revolusionária Timor-Leste Independente (FRETILIN) no Kmanek Haburas Unidade Nasionál Timor Oan (KHUNTO), kestiona prosesu konkursu ne’ebé la’o iha Bee Timor-Leste (BTL, E.P) tanba ema-ne’ebé iha esperiénsia tinan naruk la pasa.
“Ha’u kestiona no ha’u lamentável tebes prosesu konkursu ne’ebé la’o iha BTL, ep tanba iha traballadór ne’ebé ke mate-restu 12 novembru nian, ne’ebé ke tuir konkursu maibé la liu, sira-ne’ebé esperiénsia tinan barak nian iha esperiénsia atu halo operasaun serbisu iha Empreza Públika Bee Timor-Leste maibé la pasa. Ha’u kestiona prosesu ida-ne’e. Ne’e laloos,” Deputadu Bankada FRETILIN, Fabião de Oliveira, levanta liuhosi plenária, tersa ne’e.
“Ita lakohi ita-nia maluk sira-ne’e sai vítima, tanba sira iha ona esperiénsia tempu naruk kona-ba bee-moos nian, maibé hasees tiha sira hosi sira-nia serbisu. Ida-ne’e presiza haree situasaun sira hanesan ne’e,” nia fó hanoin.
Tanba ne’e, nia husu ba BTL EP atu halo avaliasaun filafali no bele halo mós investigasaun ba empreza públika ne’e hodi hatene loloos kazu ne’ebé akontese.
Entretantu, Deputadu Bankada FRETILIN, Mariano Fatubai Mota “Marito Mota”, reforsa funsionáriu sira Diresaun Água no Saneamentu ne’e serbisu tinan barak ona maibé sai fali vítima ba transformasaun empreza públika ne’e.
“Ita hatene karak durante tinan naruk, sira tuir formasaun iha Japaun, Tailándia no to’o ikusmai la uza sira sira-ne’e hatene kahur ai-moruk ba bee-moos, ita uza fali sira entaun sá polítika mak ida-ne’e,” Deputadu Marito Mota kestiona.
Purtantu, Vise-Xefe Bankada KHUNTO, Deputadu António Verdiál de Sousa, hakfodak uitoan ho asaun ne’ebé halo hosi ema boot ida ho pozisaun hanaran “Prezidente Be Timor- Leste (BTL-EP)”, ne’ebé dehan ho pozisaun refere maka ezekuta dekretu-lei no.4/2020 datadu 25 setembru ne’ebé kria Empreza Publika Bee Timor Leste no aprova estatutu hatuur iha artigu 8, la deskreve deskrisaun ida-ne’ebé klaru kona-ba funsionáriu kuadru públiku iha SAS atu hetan ezonerasaun.
Nia dehan, ema hirak-ne’e, serbisu iha Diresaun Jerál Água no Saneamentu ho tinan barak ona tanba ne’e bankada KHUNTO husu ba VIII Governu Konstitusional avalia filafali serbisu Empreza Públika Bee Timor Leste, ne’ebé la atinje nian vizaun, misaun no programa.
Entretantu, Deputadu Bankada Partidu Libertasaun Popular (PLP), Noé da Silva Ximenes “Buka-Tuir”, esplika loloos ne’e la’ós ezonerasaun ka duni-sai tanba tuir estatutu BTL tenke realiza konkursu públiku.
“Tanba tuir estatutu BTL, kuandu ita hakarak tama iha funsionáriu BTL nian, autonomatikamente ita tenke hili dalan rua, ida ita hakarak nafatin sai funsionáriu públiku no ida seluk ita hakarak sai funsionáriu empreza públika nian. Sé ita hili funsionáriu públika entaun ita labele tama iha empreza públika,” nia fundamenta.
Jornalista: Evaristo Soares Martins
Editór: Cancio Ximenes
