DILI, 01 jullu 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite hateten, ohin, Governu liuhosi INSS hahú halo ona pagamentu ba empregadór hamutuk 5.371.
Notísia Relevante: 01 jullu: INSS sei halo pagamentu ba empregadór 9.000-resin
“Dadus ne’ebé mak ita verifika no hatama ona iha sistema INSS nian ne’ebé hein pagamentu hamutuk 5.371 mak prontu ona ba prosesu pagamentu nian,” Prezidente INSS ne’e hateten ba jornalista sira, iha Caicoli, Dili.
Nia hatutan, hosi dadus 5.371 ne’e institutu públiku sira hamutuk 74, traballadór foun sira 1.370, entidade fakultativu 3.781, empreza foun hamutuk 146 ne’e mak INSS bele halo ona prosesu pagamentu no agora dadus ne’ebé sei iha prosesu verifikasaun ne’e aban bainrua ita sei halo pagamentu.
Tuir orientasaun tékniku katak, hahú ohin prosesu ba pagamentu nian hahú ona tanba INSS iha ekipa ida ba prosesu verifikasaun dadus no ekipa tan mak sei atende ba prosesu pagamentu nian.
“Ha’u orienta ona no hahú ohin halo ona pagamentu ba empregadór sira,” nia dehan.
Prezidente INSS ne’e informa, dadus ne’ebé tama ona iha INSS no sei iha prosesu verifikasaun nia-laran ne’e hamutuk 6.215.
“Ba maluk sira-ne’ebé hatama ona nia dokumentu mak seidauk kontaktu ne’e, bele mai verifika sira-nia dokumentu, karik ita-boot sira inklui mós iha totál dadus 6.215 ne’e,” nia hateten.
Notísia Relevante: INSS verifika ona dadus empregadór 5.516
Jornalista : Osória Marques
Editór : Cancio Ximenes
