DILI, 06 jullu 2021 (TATOLI)—Desde tinan 2020 to’o 2021, Ministériu Saúde (MS), iha projetu infraestrutura hamutuk 44 iha munisípiu 12, inklui Rejiaun Administrativa Espesiál Oe-cusse Ambeno (RAEOA).
Novidade ne’e, Ministra Saúde (MS), Odete Maria Freitas Belo, relata ona ba Primeiru Ministru (PM), Taur Matan Ruak durante enkontru iha rezidénsia Faról, tersa ne’e.
Notísia relevante:HNGV-Ospitál Lahane sei reabilita no konstrui fazeadamente
“Primeiru Ministru hatene ona kona-bá ita-nia programa-sira liuliu asuntu infraestrutura. Tinan ida-ne’e ita iha projetu infraestrutura ne’ebé iha hela prosesu hamutuk 44,’’ Ministra Saúde (MS), Odete Maria Freitas Belo, hateten ba jornalista-sira hafoin enkontru ho Primeiru Ministru, Taur Matan Ruak.
Odete Maria Freitas Belo, temi projetu ne’ebé la’o daudaun mak hanesan konstrusaun edifísiu Intesive Care Unit (ICU) COVID-19 no halo mós laboratóriu ba Sentru Saúde-sira.
Alende ne’e, hosi projetu 44 ne’e inklui mós konstrusaun ba postu saúde-sira inklui rezidénsia ba médiku.
Projeitu sira ne’ebé atinji ona 100%, no Ministériu Saúde uza ona mak hanesan iha kuarentena Tasi-tolu, izolamentu Lahane, balun atinji ona 80% hein atu remata, balun fali foin mak inisia iha prosesu tenderizasaun liuliu ba postu saúde no rezidénsia médiku-sira ne’ebé planeadu.
Iha fatin hanesan, Diretór Jerál Serbisu Kooperativu Ministériu Saúde, Marcelo Amaral, hateten orsamentu COVID-19 ne’ebé prevee ba Ministériu Saúde (MS) iha tinan 2021 ba área infraestrutura hamutuk millaun $8,2.
Jornalista: Felicidade Ximenes
Editór: Cipriano Colo
