iklan

DEFEZA, DILI, HEADLINE, SEGURANSA

Falur apresia ho graduadu CPOS hosi IDN-TL

Falur apresia ho graduadu CPOS hosi IDN-TL

Graduadu ne’ebé hetan valór aas-liu 16.92 iha kursu V CPOS no pós graduasaun ho valór 18, Kapitaun Domingos Oki. Imajen IDN.

DILI, 07 jullu 2021 (TATOLI)—Vise Xefe Estadu Maiór Jenerál FALINTIL Forsa Defeza Timor-Leste (F-FDTL), Majór Jenerál Domingos Raul ‘Falur Rate Laek’, apresia ho alunu Kursu Promosaun Ofisiál Superiór (CPOS sígla portugés) ba dala V no IV edisaun kursu Pós gradusaun Estudu Estratéjiku no Reziliénsia Nasionál (PGEERN sígla portugés), iha Institutu Defeza Nasionál Timor-Leste (IDN-TL).

“Ha’u kontente rona graduadu-sira nia aprezentasaun monografia individuál finál. Sira ohin ho nível akadémiku no estretejia ne’ebé nakonu ho vizionáriu tebes. Ne’e produtu hosi IDN ne’ebé la’ós foin gradua alunu-sira, maibé gradua beibeik ona durante tinan 11. Ho buka’e ne’ebé aprende hosi IDN, bele hariku pensamentu hodi bele lori ró-ahi ba portu ne’ebé di’ak,” Falur Rate Laek, hateten liuhosi komunikadu, kuarta ne’e.

Notísia relevante:IDN-TL sei fó graduasaun ba xefe xuku 442

Falur Rate Laek mós iha esperansa katak, ho esperiénsia ne’ebé alunu-sira hetan, bele hariku pensamentu hodi  bele sai líder ida ne’ebé kualidade ba institusaun iha futuru.

Iha fatin hanesan, Diretór IDN, Professór Doutór  ‘Cmd’ Donaciano Costa Gomes ‘Pedro Klamar Fuik’, hateten, asaun ne’ebé promove hosi IDN, konstitui hanesan estraordinária no kontribui ba dezenvolvimentu pensamentu estratéjiku nasionál ba atualizasaun no sensibiliza doutrina hosi diferénsia dimensaun iha seguransa no defeza nasionál.

Diretór ne’e hato’o votu parabens ba formandu-sira hotu ne’ebé iha ona koñesimentu natón no liuhosi kursu ne’e, bele potensializa ezersísiu futuru iha hala’o funsaun, kompeténsia téknika tranversál ho adekuadu.

‘Pedro Klamar Fuik’ agradese mós ba parseiru-sira ne’ebé iha tempu di’ak hatudu ona kolaborasaun ho IDN hodi finaliza kursu V CPOS no IV edisaun pós Gradusaun hanesan institutu universitáriu Militár Portugál, FDCH, UNTL, Institutu Siénsia Sosiál Polítika Universidade Lisboa Portugál, Konsellu Imprensa (CI) ba komandu F-FDTL ho PNTL.

Graduadu ne’ebé hetan valór aas-liu 16.92 iha  kursu V CPOS no pós graduasaun ho valór 18, Kapitaun Domingos Oki, sente orgullu tanba liu hosi esforsu hodi hala’o estudu durante tinan ida IDN, la espera bele hetan valór ne’ebé lori satisfasaun mós família inklui institusaun F-FDTL.

Tuir nia, benefisiu hosi apreende durante kursu iha IDN barak los, hanesan Lingua Portugés ho sira-seluk hodi hariku pensamentu atu bele kontribui dezenvolve nasaun ba oin.

Institutu Defeza Nasionál Timor-Leste (IDN-TL) iha 06 jullu 2021, realiza serimónia gradusaun ba alunu CPOS kinta  CPOS no  kuartaedisaun kursu Pos gradusaun Estudu Estrategicos e Resileiencia Nasional ( PGEERN)  ne’ebé maihosi alunu na’in 28, kompostu hosi inspetór xefe polísia nain-ualu no postu kapitaun na’in 20 hosi F-FDTL.

Alunu sira-ne’e, hetan gradusaun hafoin tuir formasaun iha IDN durante tinan ida, hahú iha fulan fevreiru 2020 to’o fevreiru 2021.

Jornalista: Nelson de Sousa

Editór: Cipriano Colo

iklan
iklan

Leave a Reply

iklan
error: Content is protected !!