DILI, 08 jullu 2021 (TATOLI)—Governu liu hosi Vise-Ministru Interiór, António Armindo, konsidera viñeta importante tebes hodi kontrola jestaun veíkulu hosi estranjeiru tama mai territóriu nasionál.
António Armindo, hato’o konsiderasaun ne’e bainhira hamutuk ho Komandante Jerál Polísia Nasionál Timor-Leste (PNTL), Komisáriu Faustino da Costa, hala’o lansamentu ba viñeta, iha postu integradu Batugade, iha kinta ne’e.
Notísia relevante:PNTL lansa viñeta ba transporte iha fronteira terrestre
“Viñeta ne’e sei sai hanesan evidénsia ba kontrolu veíkulu ho nia-funsaun atu kontrola transporte-sira ne’ebé tama mai ita nia nasaun, inklui reforsa reseita doméstika, hodi halo kolesaun taxa ba Estadu,” Governante ne’e hateten liuhosi komunikadu ne’ebé Agência Tatoli asesu, kinta ne’e.
Alende ne’e, viñeta ne’e sei asegura mós atividade iha área fronteira, hodi estimula atividade sósiu-ekonómiku iha rai laran, liu-liu oinsa transforma área fronteira sai di’ak liután iha futuru.
Bazeia ba dekretu númeru 28/2007, 2 agostu kona-bá rejime kontrolu sirkulasaun karreta tama sai teritóriu nasionál, ordena katak, presiza halo kontrolu sirkulasaun tama no sai ba viatura iha territóriu nasionál.
Ezemplu, karreta kiik no karreta pezadu-sira iha dekretu ne’e rasik temi katak, ema sira ne’ebé atu tama iha territóriu, iha lei hateten ona tenke aprezenta sira nia-dokumentu tuir prosedimentu legál ne’ebé estimula ona no dekretu ne’e mós regula ona ninia tarrefa, tuir artigu-sira ne’ebé iha ona.
Iha lansamentu ne’e, Diresaun Nasionál Tránzitu Rodoviária destaka mós membru hodi halo kontrolu ba kódigu estrada no bainhira iha movimentu estranjeiru balun maka la halo tuir autorizasaun ne’e, kontra órden sei aplika multa ho resibu evidénsia pagamentu.
Jornalista: Nelson de Sousa
Editór: Cipriano Colo
