DILI, 09 jullu 2021 (TATOLI)—Organizasaun Mundiál Saúde (OMS) iha Timor-Leste (TL), apoia ekipamentu protesaun pesoál (PPE), ba Ministériu Saúde (MS) hodi fasilita profisionál saúde iha luta kombate COVID-19.
“Ami agradese ba OMS ne’ebé fó ona apoiu tomak ba asisténsia péritu, téknika no seluk tan ba MS hodi haforsa sistema nasionál saúde iha ita-nia rain,” Ministra Saúde, Odete Maria Freitas Belo, hateten iha diskursu serimónia entrega ekipamentu iha SAMES, Kampung Alor, sesta ne’e.
Notísia relevante:OMS rekomenda, inan fó-susu bebé bele simu vasina
Odete Maria Freitas Belo, konsidera OMS hatudu nafatin kompromisu hodi fó apoiu ba Governu Timor-Leste liuliu ba Ministériu Saúde liuhosi SAMES, hodi bele reforsa profisionál saúde-sira ba prestasaun serbisu, atu hamutuk kombate COVID-19.
Iha fatin hanesan, reprezentante OMS iha TL, Arvind Mathur, hateten ekipamentu hirak-ne’e hanesan máskara 100.000, oklu, luvas, termometru, oksimetru inklui tenda.
“OMS hanesan parseiru ne’ebé sempre hamutuk ho Minsitériu Saúde, nune’e sei kontinua fó apoiu iha futuru,” Arvind Mathur promete.
Orsamentu ne’ebé OMS utiliza hodi sosa ekipamentu sira-ne’e besik miliaun $1.
Jornalista: Felicidade Ximenes
Editór: Cipriano Colo
