DILI, 09 jullu 2021 (TATOLI)—Organizasaun Mundiál Saúde (OMS), rekomenda ba inan ne’ebé sei fó-susu bebé, bele simu kualkér vasina COVID-19, tanba konsidera la fó impaktu negativu ba saúde bebé no mós inan ne’e rasik.
‘’Inan fó-susu bebé bele simu vasina saida de’it ne’ebé TL, iha tanba vasina ne’e hetan ona rekomendasaun hosi OMS hanesan Senovac no AstraZeneca,’’ Reprezentante OMS iha TL, Arvind Mathur, hateten ba jornalista Agência Tatoli, iha edifísiu SAMES, Kampung Alor, sesta ne’e.
Notísia relevante:Timor-Leste simu ona vasina hamutuk 359.800 hosi parseiru
Entretantu, to’o ohin ema hamutuk 117.027 iha Dili mak simu ona vasina doze dahuluk no ema hamutuk 15.193 mak kompleta ona vasina doze daruak.
Iha munisípiu rejista ona ema hamutuk 109.511 (20%) mak simu ona vasina doze dahuluk no ema ne’ebe mak kompleta ona vasina doze daruak hamutuk 12.126 (2%).
Jornalista: Felicidade Ximenes
Editór: Cipriano Colo
