DILI, 12 jullu 2021 (TATOLI)—Vise-Ministru Administrasaun Estatál (MAE), Lino de Jesus Torrezão, informa reklamante rihun 25-resin iha territóriu nasionál sei simu cesta bázika no sei konklui iha fulan-jullu nia laran ne’e.
Notísia Relevante: Cesta Bázika, CAC konsege trava $66.301,56
“Iha fulan (jullu) ne’e, parte implementadór sei halo distribuisaun cesta bázika ba reklamante rihun 25-resin, nune’e iha fulan ne’e distribuisaun ba cesta bázika bele konklui ona,” Vise-Ministru MAE ne’e hateten ba Agência TATOLI, iha nia knaar fatin, Caicoli, Dili, segunda ne’e.
Tuir dadus ne’ebé antes ne’e xefe suku, administradór postu no administradór munisípiu sira submete reklamante sira-nia naran ba MAE mak totál benefisiáriu ba Programa Cesta Bázika iha inísiu hamutuk ema 1.503.563 Maibé distribui ona iha territóriu laran hamutuk 1.450.
“Dadus reklamante ne’ebé durante ne’e MAE simu hosi autoridade munisipál no lokál to’o iha loron 8 fulan jullu tinan 2021, abitante hamutuk 25.005. Reklamante sira-ne’e sei iha direitu tanba sira mós nu’udar sidadaun Timor-Leste. Ita sei distribui ai-han cesta bázika ba reklamante sira tuir kalendáriu hosi Ministériu Koordenadór Asuntu Ekonómiku (MCAE) nó ministériu implemetadór sira,” nia hateten.
Implementasaun programa cesta bázika ne’e bazea ba dadus hosi autoridade lokál sira, hafoin ekipa MAE verifika no konfirma dadus tanba iha família balun nia naran la prenxe rekezitu ka iha naran dupla, no hafoin ne’e mak halo rekapitulasaun dadus hosi agregadu familiár mak MAE submete ba MKAE.
Iha terrenu distribuisaun cesta bázika la ekilibriu ho valor $50, nia hatán. kestaun ida-ne’e fora hosi Ministériu Adminsitrasaun Estatál (MAE) nia kompeténsia.
Atu responde asuntu ne’e, nia dehan, só autoridade ka ministériu implementadór sira mak bele responde hanesan Ministériu Turizmu Komersíu no Indústria (MTKI), Ministériu Agrikuktura no Peska (MAP), Sekretáriu Estadu Kooperativa (SECoop), Sentru Lojístiku Nasionál (CLN) no Rejiaun Adminsitrativa Espesiál Oé-Cusse Ambeno (RAEOA) tanba sira mak selebra kontratu ho empreza fornesedór sira.
“Normalmente distribuisaun Cesta Básica iha territóriu Timor-Leste, bazia ba Ficha da Família. Ba benefisiáriu hosi uma-kain ne’ebé mak konsidera de’it ema na’in tolu (3), no sira seluk la hetan sira-nia direitu, ida-ne’e sei bele hato’o liuhosi dalan reklamasaun,” nia hateten.
Situasaun ida-ne’e mosu, tanba hosi kedas lista inísiu hosi autoridade lokál no hosi postu administrativu iha prosesu hatama no ajusta ba iha formatu ne’ebé MAE kria mak falla.
Buat sira-ne’e hotu akontese, tuir nia, tanba pedidu urjente nó tempu ne’ebé mak fó ba xefe suku, administradór postu no munisípiu mak badak liu.
“Ita bele hanoin katak ho semana ida de’it la garante atu bele fó-sai lista ida-ne’ebé kompleta ho akuradu,” nia dehan.
Notísia Relevante: Cesta Bázika motiva agrikultór hasa’e produsaun agríkola
Jornalista : Osória Marques
Editór : Cancio Ximenes
