DILI, 12 jullu 2021 (TATOLI)—Fundu Nasaun Unida ba Infánsia (UNICEF sígla inglés), hamutuk Banku Dezemvolvimentu Aziátiku (ADB sígla inglés), entrega ekipamentu informátika no hand sanitizer ba Serbisu Autónomu Medikamentu no Ekipamentu Saúde (SAMES), hodi uza ba jestaun farmaseútika.
Ekipamentu informátika ne’e kompostu hosi, lab top hitu, desk top lima no printer lima, inklui hand sanitizer mili 200.
Notísia relevante:ADB oferese ekipamentu prevensaun COVID-19 ba MS
“Ami agardese ba parseiru-sira ne’ebé sempre apoia programa lubuk ida liuliu dezenvolvimentu instituisionál SAMES,” Diretór Ezekutivu SAMES, Santana Martins, hateten ba jornalista-sira iha edifísiu SAMES Kampung Alor, segunda ne’e.
Materiál sira-ne’e iha ona SAMES no tuir planu sei organiza atu distribui ba Diresaun-sira, nune’e bele utiliza ba nesesidade.
Iha fatin hanesan, Jestór Saúde UNICEF iha Timor-Leste, Shyam Pathak, hateten UNICEF kontinua iha prontidaun hodi suporta TL liuliu estabelese kooperasaun ho SAMES.
“Ami sempre prontu nafatin atu fó apoiu ba TL liu-liu estabelese kooperasaun ho SAMES hodi fortifika sistema saúde no kombate pandemia globál COVID-19,” Shyam Pathak, deklara.
Jornalista: Felicidade Ximenes
Editór: Cipriano Colo
