DILI, 18 jullu 2021 (TATOLI)—Governu Timor-Leste (TL), hato’o sentida kondolénsia ba família no belun-sira hosi vítima inundasaun iha parte oeste Alemaña no parte leste Béljika, kinta (15/07/21) madrugada.
“Ami-nia hato’o sentida kondolénsia kle’an tebes ba família-sira ne’ebé lakon ema ne’ebé sira hadomi. Ami mós hahii sira-ne’ebé kontinua buka ema-sira ne’ebé lakon. Iha loron difísil hirak-ne’e, TL hatudu ninia solidariedade ba Governu no populasaun tomak Alemaña no Béljika,” Ministru Prezidénsia Konsellu Ministru, Fidelis Magalhães, hateten liuhosi komunikadu, domingu ne’e.
Notísia relevante:Koordenadór identifikasaun infraestrutura konsidera sedimentasaun fatór hamosu inundasaun
Iha komunikadu ne’e mesiona, katak, ema na’in 103 iha parte oeste Alemaña no na’in 23, iha rejiaun Valônia, Béljika, mak mate tanba katástrofe naturál bo’ot liu ne’ebé akontese iha Europa sentrál.
“Udan ne’ebé boot estraga karreta, uma no mós dalan-sira, halo ema barak mak la asesu ba eletrisidade no telekomunikasaun,” komunikadu ne’e haktuir.
Maski nune’e, Governu TL louva serbisu autoridade-sira hosi nasaun hirak ne’ebé afetadu iha sira-nia serbisu hodi buka no salva ema-sira, iha kondisaun ne’ebé difísil tebetebes.
Jornalista: Natalino Costa
Editór: Cipriano Colo
