DILI, 19 jullu 2021 (TATOLI)—Polísia Nasionál Timor-Leste (PNTL), husu ba komunidade atu labele falsifika kartaun vasina COVID-19, bainhira hakarak halo viajen sai hosi Dili ba munisípiu seluk.
“Semana kotuk PNTL kaptura ema na’in-rua bainhira hala’o viajen ba Maliana no na’in-ida atu ba Baucau ne’ebé falsifika kartaun vasina. Tanba ne’e, husu komunidade atu labele falsifika hodi kumpre nafatin regra ne’ebé iha atu halo prevensaun ba transmisaun COVID-19,’’ Portavóz Komandu Jerál PNTL, Superintendente Xefe, Arnaldo Araújo, apela liuhosi konferénsia imprensa iha Komandu Jerál PNTL, Caicoli, segunda ne’e.
Notísia relevante:PNTL detein abitante 79 ne’ebé dezvia hosi Dili atu ba munisípiu
PNTL deteta sidadaun sira-ne’e, bainhira hala’o pasa revista iha pontu entrada, atu sai hosi Dili utiliza fila-fali ema seluk nia-kartaun hodi hala’o viajen.
Nune’e, PNTL koordena kedan ho Sentru Integradu Jestaun Krize (SIJK) foti ona sidadaun hirak-ne’e hodi halo identifikasaun, tanba halo asaun krime falsifikasaun dokumentu atu bele loke prosesu tuir-mai.
Nia mós husu sidadaun ne’ebé bainhira sai hosi Dili seidauk kompleta vasina dalarua no seidauk vasina, atu hato’o karta autorizasaun hosi SIJK mak bele sai.
Jornalista: Nelson de Sousa
Editór: Cipriano Colo
