SEJD fasilita joven 40 tuir formasaun hospitalidade iha ETDA
DILI, 19 jullu 2021 (TATOLI)−Sekretária Estadu Juventude no Desportu (SEJD) hamutuk ho Comoro Child and Youth Center (CCYC) fasilita joven hamutuk na’in-40 hosi sentru sentru formasaun iha Munisípiu ualu (8) hodi tuir Formasaun Hospitalidade “Prepara Foinsa’e Fornese Servisu ho Kualidade” iha Sentru Formasaun East Timor Development Agency (ETDA).
Notísia Relevante: ETDA atribui sertifikadu ba juventude 81 hosi Hera-Metinaro
“Ita prepara, fasilita no eskolla joven sira hosi sentru juventude munisípiu hitu (7) inklui Díli hamutuk ualu (8), ita fó fiar ba ETDA no ETDA mak halo formasaun ida-ne’e ba sira,” Sekretáriu Estadu Juventude no Desportu (SEJD), Abrão Saldanha, hateten ba jornalista sira iha ETDA, Bairru Pite, Dili, segunda ne’e.
Tuir nia, objetivu hosi formasaun ida-ne’e atu prepara joven sira tama iha mundu turizmu nian liu-liu iha hospitalidade, atu sira bele hatene servisu báziku turizmu nian, nune’e bele estimula sira atu bele haree setór turizmu hanesan oportunidade no bele kria empregu ba sira nia-an rasik.
Iha populasaun Timor−Leste ne’e joven mak barak liu, nune’e Governu define setór produtivu hanesan prioridade ba dezenvolvimentu ekónomiku no setór produtivu hanesan Turizmu no Agrikultura atu dezenvolve setór ida-ne’e presiza iha ema no abilidade ba setór hirak ne’e.
“Ita rekoñese katak ita−nia foinsa’e sira barak mak seidauk iha abilidade natoon ba setór ida-ne’e, liu-liu hanesan hospitalidade, turizmu no abilidade tékniku sira hanesan tein no prepara fatin ne’ebé di’akliu. Abilidade sira-ne’e sei presiza tebes atu ita-nia joven sira aprende, atu nune’e prepara ita-nia joven sira atu hodi partisipa iha dezenvolvimentu nasionál,” nia dehan.
Iha parte seluk, Diretór East Timor Development Agency (ETDA), Januario Neto Mok, hateten formasaun ida-ne’e hahú ohin no joven sira-ne’e sei aprende iha hospitalidade báziku, no durante formasaun formandus sira sei aprende hanesan abilidade housekeeping, kulinária báziku, food carving, customer service no ijiene.
“Ami fahe mós esperiénsia kona-bá saida mak turizmu no saida mak turista. Iha área sira-ne’e mak ami sei fóka liu hodi fó ba formasaun ba joven sira-ne’e durante fulan tolu nia laran,” nia dehan.
Joven sira-ne’e, nia dehan, sei aprende teoria 20% no prátika mak kuaze 80% no hafoin konklui formasaun ne’e sira sei hala’o estájiu iha EDTA hodi hakle’an liután sira-nia kuñesimentu.
Entretantu, totál orsamentu ba formasaun ne’e hamutuk rihun $40-resin ne’ebé sei fasilita joven na’in-40 ne’ebé mai hosi sentru formasaun iha munisípiu ualu hanesan Aileu, Ainaro, Bobonaro, Baucau, Ermera, Lautém, Manatuto no Díli.
Jornalista : Nelia Fernandes
Editór : Cancio Ximenes
