DILI, 22 jullu 2021 (TATOLI)—Asosiasaun Halibur Defisiénsia Matan Timor-Leste (AHDMTL), husu Governu liuhosi Ministériu Saúde (MS) atu halo atendimentu no tratamentu ne’ebé dignu ba ema ho defisiénsia sira iha aplikasaun estadu emerjénsia.
Notísia Relevante: Naturalmente Governu rona preokupasaun hosi AHDMTL
Iha loron kuarta ne’e, Diretór Ezekutivu HDMTL, Gaspar Afonso, hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, hodi informa atendimentu Ministériu Saúde ba situasaun pandemia COVID-19 ne’ebé afeta mós ba ema ho defisiénsia sira.
“Ita-boot sira hatene katak ami na’in-ualu (8) afeta COVID-19 pozitivu maibé Ministériu Saúde nia atendimentu lentu no diskriminativu,” nia informa ba jornalista sira, iha Parlamentu Nasionál.
Ho tratamentu ne’ebé la iguál ne’e entaun organizasaun refere hato’o lamentasaun no preokupasaun ba Prezidente Parlamentu Nasionál hanesan reprezentante povu atu tau iha konsiderasaun.
“Se moras ne’e perigu no da’et lalais, entaun atendimentu tenke rápidu no iguál, labele halo dikriminativu hanesan ne’e. Tanba ne’e mak ami fó hanoin ba Prezidente Parlamentu Nasionál hodi hato’o hela ba Governu,” nia dehan.
Nia hatutan, Ministériu Saúde halo tratamentu diskriminativu ba ema defisiénsia matan, tanba durante afeta COVID-19 maibé sira nunka fó atensaun.
“Sira halo tratamentu dikriminativu, tanba ami-nia ema teste hatudu katak afeta pozitivu COVID-19, maibé la fó atendimentu ida-neebé mak iguál no adekuadu. Tanba ne’e mak ami sente hanesan diskriminativu tanba moras ne’e risku duni, entaun bele tutan da’et ba vizinu, família no ema seluk,” nia informa.
Nia informa, ema ho defisiénsia hamutuka 38.118 no defisiénsia matan 12.828, ne’e la’ós ema uitoan maibé ne’e barak.
“Iha Manleuana, iha Asosiasaun HDMTL nia membru sira-ne’ebé mak akontese ida-nee. Ami iha faktu no dadus, ami la’ós mai ko’alia buat arbiru. Ami hasoru mak mai ko’alia,” nia dehan.
Nia fundamenta, iha Dili de’it halo tiha ona atendimentu hanesan ne’e, satán ema ho defisiénsia iha área rurál.
Jornalista : Evaristo Soares Martins
Editór : Cancio Ximenes
