DILI, 23 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 54, rekoperadu 45 no kazu ativu 726.
“Kazu foun 54 hosi Dili 40 no Munisípiu-sira seluk na’in 14, kompostu hosi mane 29 no feto 25,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.
Notísia relevante:Governu preokupa ho variante foun Delta COVID-19
Hosi totál kazu detetadu foun ohin, ho idade 12 mai karaik na’in-rua, entre tinan 12-59 na’in 51 (94,4%), idade 60 mai karaik na’in-ida, 24% sintomátiku.
Kumulativu kazu konfirmadu sura hosi 21 marsu 2020 to’o 23 jullu 2021 hamutuk 10.281. Hosi horisehik mai ohin, teste ne’ebé Laboratóriu Nasionál Saúde halo hamutuk 742 PCR, ho detallu hanesan tuir-mai, Vijilánsia sentinela 22, rastreiu ba kontaktu ka Contact tracing 10, Rastreiu Aleatóriu ka Random Screening nain 36, Viájen sai-hosi serka sanitária hosi Dili 542, Viájen internasionál 38, Follow up iha kuarentena na’in 122.
Totál testes PCR ne’ebé halo horisehik 22 jullu iha Munisípiu-sira seluk, RAEOA no HNGV hamutuk 277 ho detalla hanesan tuir-mai, Maubisse 41, Maliana 16, Viqueque 15, Suai ualu, Baucau 92, Ermera 67 RAEOA 45 no HNGV 26.
Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 23 jullu tuir sistema informasaun Sáude iha Ministériu Saúde, totál kumulativu 1ª doze iha Dili 126.831 (59,3%) no totál kumulativu 2ª doze iha Dili 61.919 (28,9%).
Ema ne’ebé simu ona vasina doze dahuluk iha Timor-Leste 262.933 (34,8%) no simu ona doze daruak 74.918 (9,9%).
Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.
Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.
Hosi insidénsia COVID-19 iha Timor-Leste, durante loron hitu ikus maka 2,5/100 mil abitante, enkuantu ba de’it munisípiu Díli 6,4/100 mil abitante.
Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.
Informasaun hosi izolamentu
Iha 23 jullu 2021, izolamentu Vera Cruz halo tratamentu ba kazu detetadu na’in 13, iha área obstetrisia na’in-tolu, no iha medisina interna na’in-hitu iha sirurjia na’in-tolu. Iha obstetrisia na’in-tolu kategoria leve (mild) hotu. Iha área medisina interna na’in-hitu. Rua grave, rua uza ventiladór, na’in-rua moderadu, nain-tolu leve mild hotu. Sira nain-tolu iha sirurjia kategoria leve mild hotu.
Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.
Apelu
Apela ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona, atu prevene moras COVID-19 da’et ba mai.
Regra sira-ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.
Jornalista: Felicidade Ximenes
Editór: Cipriano Colo
